Fota: Valeryj Šaryfulin / TASS
Ukraina pačała zdabyvać haz mietadam frekinhu (hidraŭličny razryŭ płasta), raspavioŭ u intervju Bloomberg staršynia praŭleńnia ŭkrainskaha «Naftahaza» Andrej Kobaleŭ. Upieršyniu frekinh byŭ užyty na hazavaj śvidravinie kala miesiaca tamu, skazaŭ Kobaleŭ, nie ŭdakładniŭšy, u jakim rajonie krainy. Zdabyču viadzie «Ukrhazdabyča» — daččynaje pradpryjemstva «Naftahaza».
Pa słovach Kobaleva, Kijeŭ pavinien pavialičyć zdabyču hazu ź ciapierašnich 20 młrd kubamietraŭ u hod da 27 młrd, kab całkam pierajści na samazabieśpiačeńnie pryrodnym hazam. U «Naftahaza» niama dośviedu zdabyčy hazu z dapamohaj frekinhu, ale jon źbirajecca supracoŭničać z partniorami ź inšych krain, jakija mohuć dać buravoje abstalavańnie, rastłumačyŭ kiraŭnik kampanii.
Mietad frekinhu zvyčajna ŭžyvajecca dla zdabyčy słancavaha hazu, ale moža vykarystoŭvacca i dla pavyšeńnia addačy ad tradycyjnych śvidravin. Pa dadzienych Upraŭleńnia enierhietyčnaj infarmacyi ZŠA, jakija pryvodzić ahienctva Bloomberg, na Ukrainie moža znachodzicca da 3,6 trłn kub. m. słancavaha hazu — čaćviortyja pa vieličyni ŭ Jeŭropie zapasy. Niekatoryja ŚMI, u pryvatnaści TASS, paviedamili sa spasyłkaj na intervju Kobaleva, što Ukraina pačała zdabyvać mienavita słancavy haz.
Paźniej «Naftahaz» na svajoj staroncy ŭ Facebook udakładniŭ, što słancavym hazam kampanija zajmacca nie źbirajecca. «My płanujem vykarystoŭvać dastupnyja sučasnyja technałohii, kab efiektyŭna zdabyvać tradycyjny haz», — havorycca ŭ paviedamleńni.
U minułym hodzie Kijeŭ zdabyŭ tolki 17,4 miljardaŭ kubamietraŭ — samy nizki pakazčyk za 10 hadoŭ, śviedčać dadzienyja z spravazdačy VR Statistical Review. Pry hetym u zajavie «Naftahaza» padkreślivajecca, što va Ukrainy «dastatkova reziervaŭ tradycyjnaha hazu, kab nie mieć patreby ŭ imparcie».
Ukraina šukaje novyja krynicy dla pavieličeńnia abjomu zdabyčy hazu paśla taho, jak jaho pastaŭki ŭ krainu ŭ minułym hodzie spyniŭ «Hazprom» z-za adsutnaści pieradapłaty z boku Kijeva. Ukraina tłumačyła svajo rašeńnie tym, što zakuplać haz u Jeŭropie dla jaje tańniej, čym impartavać jaho naŭprost z Rasiei. Paźniej Kobaleŭ skardziŭsia i na skaračeńnie pastavak «Hazproma» ŭ Jeŭropu, źviazvajučy heta ź ciskam na Ukrainu. Zrešty, u rasijskaj kampanii heta tłumačyli płanavym ramontam.
«Naftahaz» zajaŭlaŭ pra hatoŭnaść viarnucca da trochbakovych pieramovaŭ ź Jeŭrakamisijaj i «Hazpromam» pa pytańniach pastavak rasijskaha hazu, adnak pakul zakupki tak i nie adnavilisia. Rasija hatova adnavić ekspart u lubuju siekundu, kazaŭ na minułym tydni prezident Uładzimir Pucin, ale tolki kali Kijeŭ ažyćciavić pieradapłatu. «Košt budzie nie vyšejšy, čym dla susiednich dziaržaŭ, u pryvatnaści dla Polščy. Na momant našaj razmovy Polšča ŭ nas pa tych dziejnych abaviazacielstvach kuplała haz dzieści pa $185 za 1 tys. kub. mietraŭ», — paviedamiŭ Pucin (pavodle «Interfaksu»).
U kancy kastryčnika Jeŭrakamisija dazvoliła «Hazpromu» pavialičyć pastaŭki hazu ŭ abychod Ukrainy — z 18 młrd da 28,2 młrd kub. m. u hod (havorka idzie pra pastaŭki pa hazapravodzie OPAL, jaki złučaje «Paŭnočny patok» i hazatranspartnuju sistemu Centralnaj i Zachodniaj Jeŭropy). U intervju Bloomberg Kobaleŭ taksama skazaŭ, što dla Kijeva heta rašeńnie stała «šokam» jano «naniasie značnuju škodu finansavym pazicyjam nie tolki «Naftahaza», ale i ŭsioj krainy». Zaraz ŭkrainskaja kampanija šukaje jurydyčnyja sposaby vyrašeńnia hetaj situacyi, dadaŭ Kobaleŭ.
