U Žłobinie miascovy žychar, jakoha paklikała na dapamohu advakatka, zamknutaja na bałkonie, abrabavaŭ jaje. Padrabiaznaści kryminalnaj spravy raspavioŭ adździeł infarmacyi i hramadskich suviaziaŭ UUS Homielskaha abłvykankama.
Advakatka biez mabilnaha telefona vyjšła na bałkon papić kavy, a ŭ hety čas dyrektar firmy, dzie žančyna aranduje płošču dla svajoj dziejnaści, sychodziačy, zamknuŭ bałkonnyja dźviery. Sproby paklikać kaho-niebudź na dapamohu pośpiechu nie mieli — pamiaškańni ŭžo byli pustyja. Mima prachodziła kampanija maładych chłopcaŭ, jakija pačuli prośbu ab dapamozie — zajści z advarotnaha boku doma ŭ ofis i adčynić dźviery.
Maładyja ludzi, zajšoŭšy ŭ pamiaškańnie, nie stali śpiašacca na dapamohu. Adzin ź ich uziaŭ sa stała noŭtbuk Lenovo, paśla čaho ŭsie nakiravalisia da vychadu.
Dźviery bałkona paśla adčyniŭ adzin z klijentaŭ advakatki, jakomu byŭ pryznačany čas pryjomu.
Supracoŭniki kryminalnaha vyšuku rajadździeła milicyi spracavali apieratyŭna. Pa najaŭnych fotatablicach žančyna apaznała rabaŭnika. 23-hadovy chłopiec byŭ raniej nieadnojčy sudzimy, apošni raz — za kradziež u hetym hodzie. Vyzvaliŭsia 1 kastryčnika.
Raspačataja kryminalnaja sprava pa fakcie rabavańnia, a skradzieny noŭtbuk viarnuŭsia da haspadyni. Jaho znajšli padčas vobšuku pa miescy žycharstva zatrymanaha.
