Bolšaść kinafilmaŭ, jakija zdymajucca siońnia, — heta śmiećcie, ličyć režysior-dakumientalist, člen žury konkursu nacyjanalnych kinaškoł mižnarodnaha kinafiestyvalu «Listapad» Halina Adamovič.
Mierkavańnie pra toje, što ciapier u kino, asabliva dakumientalnaje, prychodzić vielmi šmat nieprafiesijanałaŭ, jana vykazała 4 listapada na pres-kanfierencyi, pryśviečanaj adkryćciu 23-ha Minskaha mižnarodnaha kinafiestyvalu «Listapad».
Pavodle słoŭ režysiora, heta adbyvajecca tamu, što zdymka kino stała dastupnaj. Filmy ciapier možna zdymać navat na telefon.
«U hetym hodzie ja adpracavała ŭ troch žury, i, na žal, u dakumientalnym kino było 90% nieprafiesijnych filmaŭ, — adznačyła Adamovič. — Vielmi ciažka adhledžvać nieprafiesijnyja, nievyraznyja filmy, kali čałaviek sam nie razumieje, jakuju historyju jon raspaviadaje, pra što jon robić kino. Zrazumieła, što kino pryciahvaje vielizarnuju kolkaść maładych ludziej, — heta prestyžna, heta dobra być režysioram, ale heta kolkaść śmiećcia mianie pryhniataje».
Miž tym demakratyzacyja techničnaha pracesu, jakaja daje aŭtaru novyja mahčymaści dla stvareńnia filmaŭ, natchniaje piśmieńnika, mastaka i architektara, člena žury nacyjanalnaha konkursu Artura Klinava.
Jon pahadziŭsia z tym, što 90% kinafilmaŭ, jakija zdymajucca, — heta śmiećcie, i adznačyŭ, što toje ž samaje niekalki hadoŭ tamu adbyvałasia ŭ fatahrafii, kali na źmienu lustranym kamieram pryjšła ličba, a potym i telefon. Tady, pavodle jaho słoŭ, źjavilisia tysiačy maładych fatohrafaŭ, jakija prynieśli z saboj kuču śmiećcia.
«Ale ja dumaju, što lepš mieć aktyŭny žyvy praces, niachaj navat i paŭprafiesijny, čym zastoj i stahnacyju, — adznačyŭ Klinaŭ. — Demakratyzacyja techničnaha pracesu zdymki daje vialiki šaniec biełaruskamu kino. Tut jakraz vyjście dla krain, uklučajučy nas, dzie niama vialikaj kinaindustryi, hihanckich fabryk pa vytvorčaści kinapradukcyi».
Na dumku Klinava, nieabchodna znajści svoj šlach, svajo abličča i svoj kinapraces. «A dla hetaha treba stvaryć nieabchodnuju infrastrukturu — konkursy, fiestyvali alternatyŭnaha, niezaležnaha kino, patrebien miechanizm, jaki b adździalaŭ śmiećcie. Heta nas šaniec, jaki natchniaje», — skazaŭ jon.
