Žart pra bombu ŭ sumcy paviarnuŭsia dla pasažyra minskaha mietro kryminalnaj spravaj, paviedamili va UUS pa achovie Minskaha mietrapalitena.
Adzin ź viestybiulaŭ stancyi mietro «Kamiennaja horka« 31 kastryčnika pierakryvaŭsia dla ŭvachodu i vychadu pasažyraŭ z-za paviedamleńnia pra bombu. 24-hadovy ŭradženiec Lepiela pry prachodzie ŭčastka nadhladu paviedamiŭ inśpiektaru słužby biaśpieki, što ŭ jaho ŭ sumcy znachodzicca bomba. Nieadkładna na stancyju była nakiravanaja milicyja, hrupa raźminiravańnia, MNS, bryhada chutkaj miedycynskaj dapamohi. Vybuchovuju pryładu nie znajšli. Žart paviarnuŭsia dla chłopca vielmi surjoznymi nastupstvami - u dačynieńni da jaho raspačataja kryminalnaja sprava pa č.1 art.340 KK.
Jak adznačyŭ načalnik UUS pa achovie Minskaha mietrapalitena Kirył Kisłoŭ, padobnyja paviedamleńni ŭ apošni čas źjaŭlajucca vielmi raspaŭsiudžanaj źjavaj. Tolki za minuły tydzień praca mietrapalitena była trojčy dezarhanizavanaja. U bolšaści vypadkaŭ pryčynaj takich paviedamleńniaŭ nazyvajuć banalnaje žadańnie pažartavać.
Za padobnyja žarty praduhledžanaje surjoznaje pakarańnie, kanstatavali va UUS pa achovie Minskaha mietrapalitena. Naprykład, u kancy minułaha hoda mužčyna zaviedama iłžyva paviedamiŭ pra vybuch, jaki rychtujecca na stancyi mietro «Mahiloŭskaja». U lutym hetaha hoda sudom Zavodskaha rajona Minska jon asudžany da 3 hadoŭ abmiežavańnia voli biez nakiravańnia ŭ vypraŭlenčuju ŭstanovu adkrytaha typu.
