Dziaržaŭtainśpiekcyja prosić kiroŭcaŭ i piešachodaŭ być bolš uvažlivymi ŭ składanych umovach nadvorja, paviedamili va UDAI HUUS Minharvykankama.
U bližejšyja vychadnyja dni na terytoryi Biełarusi čakajucca składanyja ŭmovy nadvorja: u mnohich rajonach krainy projdzie śnieh, mokry śnieh, jaki pierachodzić u doždž. Dniom u asobnych rajonach horada prahnazujucca mocnyja apadki. Tempieratura pavietra nočču składzie ad minus 1 da minus 3 hradusaŭ, dniom budzie ad nula da 2 hradusaŭ sa znakam plus.
U Minsku ŭ paniadziełak nočču prahnazujucca karotkačasovyja apadki — mokry śnieh, doždž. Dniom projduć daždžy, u asobnych rajonach horada mocnyja daždžy. Tempieratura nočču składzie 1-3 hradusy ciapła, dniom — 4-6 hradusaŭ vyšej za nul.
U zimovy pieryjad, kali paharšajucca ŭmovy nadvorja i skaračajecca śvietły čas sutak, dola avaryj z udziełam piešachodaŭ pavialičvajecca. Časta piešachody vidavočna ihnarujuć sihnały śviatłaforaŭ, nie źviartajuć uvahi na darožnyja znaki. I ŭsio ž taki asnoŭnaj pryčynaj strašnaj statystyki źjaŭlajucca ryzykoŭnyja pavodziny na darozie, a mienavita — pierachod prajeznaj častki nie va ŭstanoŭlenych miescach i niečakanaje źjaŭleńnie pierad transpartnymi srodkami, jakija ruchajucca.
«Čamuści piešachody pamyłkova dumajuć, što kiroŭca ich užo zaŭvažyŭ, i, nie hledziačy pa bakach, upeŭniena stupajuć na prajeznuju častku. Adnak pry skoraści 60 km/hadz za adnu siekundu aŭtamabil prajazdžaje amal 17 m: za hety čas kiroŭca ledź paśpiavaje zrazumieć, što abo chto pierad im. Zatarmazić abo ŭdačna zmanieŭravać u takoj situacyi naŭrad ci mahčyma», — adznačyli va UDAI HUUS Minharvykankama.
Kiroŭcaŭ prosiać być maksimalna ŭvažlivymi da pažyłych piešachodaŭ, nie padhaniać ich hudkom sihnału, prajaŭlać razumieńnie i pavahu. Zhodna z PDR kiroŭca pavinien być hatovy źnizić skoraść ruchu abo spynicca, kab vyklučyć vierahodnaść najezdu na piešaha ŭdzielnika darožnaha ruchu.
