Miarkujecca, što ŭ spravazdačy budzie dadziena acenka fiskalnym ryzykam, źviazanym ź dziejnaściu dziaržpradpryjemstvaŭ.

«Možna čakać, što dziakujučy spravazdačy pavysicca adkaznaść halinovych ministerstvaŭ za svaje pradpryjemstvy, pakolki budzie dadziena niezaležnaja acenka situacyi ŭ kankretnych arhanizacyjach. Adpaviedna, na ŭzroŭni ministerstvaŭ i viedamstvaŭ pavinny buduć zrobleny vysnovy ab nieabchodnym pavyšeńni efiektyŭnaści pracy padviedamnych kamiercyjnych arhanizacyj», — rastłumačyŭ BiełaPAN nieabchodnaść zhadanaj spravazdačy ekśpiert u finansavych kołach.

Miarkujecca taksama, što spravazdača ab situacyi ŭ dziaržsiektary dazvolić uradu prymać bolš abhruntavanyja miery ŭ častcy vydzialeńnia srodkaŭ dziaržpradpryjemstvam.

«Ideja ŭ tym, kab pahladzieć situacyju na mikraŭzroŭni i zrabić adpaviednyja vysnovy», — skazaŭ ekśpiert.

Pavodle infarmacyi BiełaPAN, techničnaja misija MVF, jakaja ŭ hetyja dni pracuje ŭ Biełarusi, dapamoža ŭładam vypracavać mietadałohiju acenki fiskalnych ryzyk, źviazanych ź dziejnaściu dziaržpradpryjemstvaŭ.

«Pa zaprašeńni ŭrada i Nacyjanalnaha banka 2 listapada ŭ Biełarusi pačała pracu techničnaja misija Mižnarodnaha valutnaha fondu pa pytańniach dziaržpradpryjemstvaŭ, chutka da jaje padklučacca ekśpierty Suśvietnaha banka», — paviedamiŭ na minułym tydni na Kastryčnickim ekanamičnym forumie (KEF) pieršy namieśnik ministra ekanomiki Alaksandr Zabaroŭski.

Jak paviedamlałasia raniej, piersanał MVF rekamiendavaŭ biełaruskim uładam stvaryć na bazie Minfina padraździaleńnie, jakoje na rehularnaj asnovie budzie aceńvać finansavaje stanovišča dziaržsiektara i analizavać fiskalnyja ryzyki, źviazanyja ź jaho dziejnaściu.

Na dumku MVF, va ŭmovach kali finansavaje stanovišča mnohich dziaržpradpryjemstvaŭ pahoršyłasia, istotna ŭzraśli fiskalnyja ryzyki, jakija ŭźnikajuć u biudžetnaj śfiery ŭ suviazi z uzajemadziejańniem dziaržavy ź dziaržsiektaram.

Ekśpierty valutnaha fondu ličać, što fiskalnyja ryzyki mohuć vyražacca ŭ pramych vydatkach dla biudžetu ŭ suviazi z atrymańniem mienšych dyvidendaŭ i padatkaŭ ad dziaržpradpryjemstvaŭ.

Akramia taho, na dumku MVF, ryzyki dla biudžetu źviazanyja z tym, što va ŭmovach paharšeńnia finansavaha stanovišča dziaržpradpryjemstvaŭ mohuć spatrebicca subsidyi na pakryćcio raschodaŭ pa stratnych kirunkach dziejnaści. Taksama fond bačyć fiskalnyja ryzyki ŭ tym, što mohuć spatrebicca dadatkovyja biudžetnyja raschody na zachavańnie dziaržharantyj pa kredytach, raniej vydadzienych dziaržaŭnym pradpryjemstvam.

Клас
Панылы сорам
Ха-ха
Ого
Сумна
Абуральна