Padčas praviedzienych refierendumaŭ u ZŠA žychary štata Niebraska admianili maratoryj na śmiarotnaje pakarańnie, a ŭ Kałarada dazvolili eŭtanaziju dla śmiarotna chvorych, piša VVS.
Za admienu ŭviedzienaha ŭ 2015 hodzie maratoryja na śmiarotnaje pakarańnie ŭ Niebrascy prahałasavali 61,2% vybarščykaŭ, za jaho zachavańnie — 38,5%. Jak adznačajuć naziralniki, bolšaść tych, chto hałasavaŭ za admienu maratoryja — žychary pieravažna sielskich rajonaŭ.
Śmiarotnaje pakarańnie budzie prymianiacca tolki da asudžanych za zabojstva pieršaj stupieni.
Jak zajaviŭ adzin ź lidaraŭ inicyjatyŭnaj hrupy, jakaja vystupała za viartańnie pakarańnia śmierciu, na vyniki hałasavańnia mahli paŭpłyvać niadaŭnija hučnyja zabojstvy. U jakaści prykładu jon pryvioŭ spravu Nika Dženkinsa, jaki ŭ 2013 hodzie zabiŭ čatyroch čałaviek u horadzie Amacha — jak jon zapeŭnivaŭ, pa zahadzie staražytnajehipieckaha boha Apofisa.
U Kałarada ŭ vyniku zboru podpisaŭ byŭ vyniesieny na publičnaje hałasavańnie zakonaprajekt ab eŭtanazii dla śmiarotna chvorych pacyjentaŭ, jakim lekary prahnazujuć śmierć na praciahu paŭhoda.
Zakon daje takim pacyjentam mahčymaść «atrymać leki, jakija moža pryniać sam pacyjent, i jakija ŭ hetym vypadku vykličuć jaho śmierć, u luboha licenzavanaha i achvotnaha [vydać takija leki pacyjentu] lekara».
Aproč Kałarada, eŭtanazija na siońniašni dzień lehalizavanaja ŭ štatach Vašynhton, Viermont, Arehon i Kalifornija. U astatnich štatach asistavanaje samahubstva zabaronienaje.
Śmiarotnaja kara praduhledžanaja zakanadaŭstvam 31 štata ZŠA, adnak u bolšaści ź ich hetaja miera pakarańnia nie ŭžyvajecca.
U 2015 hodzie ŭ ZŠA byli pakaranyja 28 asudžanych — u štatach Techas, Misury, Akłachoma, Džordžyja, Fłaryda i Virdžynija. Z pačatku 2016 hoda ŭ ZŠA pakarali śmierciu 17 čałaviek.
