Tankavaja bryhadnaja hrupa amierykanskaj armii źjavicca ŭ Jeŭropie ŭ studzieni 2017 hoda ŭ ramkach uzmacnieńnia hrupoŭki, jakaja musić supraćstajać mahčymaj rasijskaj ahresii.
Pra heta paviedamiŭ defensenews.com hienierał-lejtenant Bien Chodžes, kamandujučy Suchaputnych vojskaŭ ZŠA ŭ Starym śviecie.
3-ja tankavaja bryhada 4-j piachotnaj dyvizii nosić mianušku «Žaleznaja», vajavała ŭ Iraku i Afhanistanie.
Samachodnaja artyleryja 3 tankavaj bryhadnaj hrupy 4 piachotnaj dyvizii ŭ Kuviejcie ŭ 2015 hodzie. Fota fortcarsonmountaineer.com
Jana adpravicca ŭ Jeŭropu jak častka sił apieracyi «Atłantyčnaja rašučaść», meta jakoj — demanstracyja padtrymki chaŭruśnikaŭ pierad abliččam rasijskaj pahrozy i ŭzmacnieńnie ahulnaha frontu na vypadak abvastreńnia, piša military.com.
Tankavaja bryhadnaja hrupa maje kala 4700 čałaviek asabovaha składu, 90 tankaŭ Abrams, 90 bajavych mašyn piachoty Bradley, 112 bronietransparcioraŭ M113.
Adnačasova jana praviadzie vučeńni pa chutkaj zahruzcy i vyhruzcy ŭ bajavych umovach u niamieckich i polskich partach — hetaje ŭmieńnie moža spatrebicca, kali amierykancam budzie treba chutka i ŭ vialikaj kolkaści pierakidvać svaje vojski ŭ Jeŭropu.
Hrupa budzie ŭdzielničać u inšych manieŭrach na praciahu 2017 hoda. Asnoŭnyja častki bryhadnaj hrupy buduć stajać u zachodniaj Polščy. Vosieńniu 2017 hoda «Žaleznych» źmienić inšaja amierykanskaja bryhada pa pryncypie ratacyi.
Takim čynam, ź ciaham času asnoŭnaja častka amierykanskich vojskaŭ moža atrymać dośvied chutkaha transpartavańnia ŭ Jeŭropu i vučeńniaŭ suprać mahčymaha napadu z boku RF.
