«Prablemnyja aśpiekty ŭ biełaruska-rasijskim uzajemadziejańni» abmierkavali ŭ telefonnaj razmovie 9 listapada Alaksandr Łukašenka i prezident RF Uładzimir Pucin.
«Rašeńni pa ich prapracoŭvalisia ŭradami dźviuch krain i buduć kančatkova pryniatyja na sustrečy kiraŭnikoŭ dziaržaŭ, jakaja, zhodna z papiaredniaj damoŭlenaściu, adbudziecca na praciahu nastupnych dvuch tydniaŭ», — havorycca ŭ paviedamleńni pres-słužby biełaruskaha kiraŭnika.
Łukašenka i Pucin taksama abmierkavali pytańni mižnarodnaha paradku dnia, u pryvatnaści vyniki vybaraŭ u ZŠA i ich mahčymy ŭpłyŭ na raźvićcio rehijanalnych i hłabalnych pracesaŭ.
Biełaruski lidar raskazaŭ kalehu «i pra niekatoryja padrabiaznaści svajho niadaŭniaha vizitu ŭ Blizkaŭschodni rehijon».
Pres-słužba Kramla pa vynikach razmovy koratka adznačyła: «Prezident Biełarusi padzialiŭsia ŭražańniami pra svaje niadaŭnija vizity ŭ Katar i Abjadnanyja Arabskija Emiraty — u hetaj suviazi zakranuty aktualnyja pytańni situacyi ŭ Siryi i na Blizkim Uschodzie. Uładzimir Pucin i Alaksandr Łukašenka abmierkavali taksama hrafik asabistych kantaktaŭ, jakija majuć adbycca».
Jak užo paviedamlałasia, Minsk i Maskva dahetul nie ŭrehulavali pytańni cany rasijskaha hazu i zahruzki syravinaj biełaruskich naftapierapracoŭčych zavodaŭ.
