Biełaruś i Ukraina dasiahnuli zhody ŭ pytańni źniaćcia astatnich barjeraŭ va ŭzajemnym handli, paviedamiŭ žurnalistam biełaruski vice-premjer Uładzimir Siamaška 10 listapada pavodle vynikaŭ praviedzienaha ŭ Minsku 24-ha pasiadžeńnia mižuradavaj biełaruska-ŭkrainskaj źmiašanaj kamisii pa pytańniach handlova-ekanamičnaha supracoŭnictva.
government.by
«My damovilisia i napiaredadni pasiadžeńnia, i ŭ pracesie ab źniaćci tych niekatorych barjeraŭ, jakija ŭ nas zastavalisia. Mahčyma, nie tak prosta, ale ŭsio-tki my vypracavali padychody i schiemy, jak nie dapuskać źjaŭleńnia takich barjeraŭ, kab, kali jany tolki ŭtvarajucca, my apiaredžvali ich», — skazaŭ Siamaška.
«Pa pastaŭkach cemientu va Ukrainu ŭ nas byli prablemy. Vy viedajecie, što my niadaŭna madernizavali našy cemientnyja zavody, adzin z nula pabudavali, stvaryli mahutnaści. Ale my kanstatavali, što va Ukrainu čamuści za apošnija dva hady naš ekspart cemientu źniziŭsia ŭ 20 razoŭ, choć heta absalutna kankurentazdolny pradukt, — adznačyŭ jon. — Zaraz karektujecca narmatyŭnaja dakumientacyja va Ukrainie, što dazvolić biez usialakich farmalnych abmiežavańniaŭ pastaŭlać cemient. Abmiežavańnie budzie adno — kankurentazdolnaść pa canie i jakaści». Pry hetym Siamaška nie ŭdakładniŭ, jakoha rodu barjer maje na ŭvazie.
«U nas było abmiežavańnie, jakoje dziejničała amal paŭhoda, adnosna pastavak reaktyŭnaha paliva. Siońnia mahu vas prainfarmavać, što z 1 listapada hetaha hoda abmiežavańnia niama. Dla Ukrainy heta budzie važna, tamu što heta stabilizuje rynak», — praciahnuŭ vice-premjer.
Pavodle jaho słoŭ, na siońniašniaj sustrečy dasiahnutaja damoŭlenaść ab stvareńni darožnaj karty dvuchbakovaha supracoŭnictva, što hruntujecca na aktyvizacyi takich kirunkaŭ, jak mašynabudavańnie, u tym liku stvareńnie novych zboračnych vytvorčaściaŭ biełaruskaj techniki z łakalizacyjaj nie mienšaj jak 50%, i sielskaja haspadarka. Asnoŭnaja meta budučaj darožnaj karty — davieści ŭzajemny tavaraabarot da 8 młrd dołaraŭ na hod.
U svaju čarhu vice-premjer — ministr rehijanalnaha raźvićcia, budaŭnictva i ŽKH Ukrainy Hienadź Zubko paviedamiŭ, što pry karektavańni ŭkrainskaha padatkovaha zakanadaŭstva na 2017 hod źjaŭlajecca bolš mahčymaściaŭ dla svabodnaj pracy biełaruskich padatkapłacielščykaŭ va Ukrainie. Pavodle jaho słoŭ, baki taksama abmierkavali mahčymaść biudžetnaha subsidavańnia zakupak biełaruskaj sielskahaspadarčaj i kamunalnaj techniki.
«Biełaruś siońnia źjaŭlajecca stratehičnym partnioram Ukrainy. I my chacieli b, kab hety status padtrymlivaŭsia jašče mnohija dziesiacihodździ», — skazaŭ na zakančeńnie Zubko.
