Vierasień i kastryčnik — heta miesiacy, kali vychodzić najbolšaja kolkaść televizijnych sieryjałaŭ. Pačynajucca novyja prajekty, praciahvajucca staryja. Razabracca va ŭsich navinkach — nie takaja ŭžo prostaja zadača. «NN» prapanuje vašaj uvazie mini-hajd pa najlepšych sieryjałach apošnich tydniaŭ.

«Narka» (Narcos)

Kryminalnaja drama, bijahrafija. ZŠA, 2-i siezon

Adznaka na IMDB: 8,9 z 10

U centry sieryjała asoba słavutaha kałumbijskaha narkahandlara Pabła Eskabara. Hałoŭnuju rolu pierakanaŭča syhraŭ brazilski akcior Vahnier Moŭra. Amierykanskija ahienty UNB (upraŭleńnia pa baraćbie z narkotykami) Miorfi i Pieńja traplajuć u Kałumbiju, kab prykryć trafik kakaina ŭ Majami. U Paŭdniovaj Amierycy jany sutykajucca sa śpiecyfikaj rehijonu, jaho žorstkaściu i pradažnaściu.

Pabła Eskabar — heta lehiendarny narkabaron. Jon stvaryŭ vializnuju nielehalnuju impieryju i staŭ adnym z najbahaciejšych ludziej płaniety. Eskabar nastolki adčuvaŭ svaju biespakaranaść i usiemahutnaść, što navat vynošvaŭ płany stać prezidentam Kałumbii. Kali na jaho palityčnaj karjery pastavili kryž, to jon pieraklučyŭsia na kryvavy teror. Adny ličyli jaho zabojcam i pačvaraj, inšyja, naadvarot, uznosili da niabios.

Eskabar byŭ niedasiažny dla palicyi, paŭsiul byli jahonyja ludzi, jakija papiaredžvali pra niebiaśpieku za krok ad raskryćcia. Pabła ŭ sieryjale nie vyklikaje tolki niehatyŭnych pačućciaŭ. Stvaralnikam atrymałasia pakazać jaho absalutna roznym čałaviekam: i biaźlitasnym zabojcam, i dobrym baćkam. Vy ŭbačycie Eskabara ŭ zienicie jaho słavy, ale i ŭ chviliny poŭnaj biezdapamožnaści. Chto jon taki? Vyrašać vam samim.

Sieryjał biare najpierš sapraŭdy vielmi mocnaj historyjaj, jon nie zaciahnuty i dynamičny. Jak minus krytyki adznačali tolki adsutnaść piersanažaŭ, jakim chočacca spačuvać.

«Adryŭ» (The Get Down)

Drama, miuzikł. ZŠA, 1-y siezon

Adznaka na IMDB: 8,5 z 10

Bronks 1970-ch — heta nibyta i častka Ńju-Jorka, ale jon žyvie pa svaich praviłach. Rajon zasieleny čarnaskurymi i łacinasami. Vulicami praviać bandy, pradajucca narkotyki, načami moładź adryvajecca na lehalnych i padpolnych dyskatekach. Nijakich pierśpiektyvaŭ i nijakaj budučyni dla siabie nichto nie bačyć.

Vyjście zastajecca tolki ŭ tvorčaści. Školnik Ijezekil Fihuera piša cudoŭnyja vieršy. Adnak taksama nie viedaje, što rabić i kudy padacca. Jahonaja siabroŭka i kachańnie Milena Kruz maryć stać papularnaj pop-śpiavačkaj, u jaje pieršakłasnyja dadzienyja, ale taksama jość baćka-pastar, jaki suprać taho, kab dačka išła ŭ šou-biz.

«Adryŭ» — heta sieryjał pra toje, jak zaradžaŭsia rep, dy-džejstva, pop-muzyka, kultura hrafici. Tyja rečy, bieź jakich užo nie ŭsprymajecca sučasny śviet. Film atrymaŭsia vielmi hustoŭnym, usio hetaje niezvyčajnaje adzieńnie i pryčoski 70-ch, duch času pieradadzieny na vydatna. Nu a pra muzyčnaje supravadžeńnie sieryjała ŭvohule kazać niama čaho — jano na vielmi vysokim uzroŭni.

«Ekzarcyst» (The Exorcist)

Žachi. ZŠA, 1-y siezon

Adznaka na IMDB: 8,3 z 10

Ajciec Tamas Arteha — adzin z samych pierśpiektyŭnych katalickich śviataroŭ Čykaha. Jon zdolny vyklikać prychilnaść ludziej, razmaŭlać ź imi na adnoj i toj ža movie. Jaho parafija nie samaja bahataja, ale ŭ joj žyvuć nabožnyja ludzi. I ŭsie ŭ zachapleńni ad ajca Tamasa.

Takaja pastaralnaja karcina ŭ śviecie śviatara isnuje roŭna da taho momantu, pakul adna z prychadžanak nie prychodzić da jaho ź śpiecyfičnaj razmovaj. Žančyna ličyć, što ŭ jaje dačku ŭsialiŭsia djabał. Ajciec Tamas sprabuje razupeŭnić surazmoŭcu, što niačystaja siła — heta tolki prydumki. I djabał nie moža naŭprost zabrać cieła čałavieka. Adnak vielmi chutka jon pierakonvajecca, što nie mieŭ racyi.

Ułasnymi siłami ajciec Tamas nie zdolny spravicca z demanam, na dapamohu jamu prachodzić daśviedčany ekzarcyst ajciec Markus. Dačakacca dapamohi ad instytuta Kaścioła jany nie mohuć. U toj samy čas, kali ŭ Čykaha čakajecca vizit Papy, u horadzie pačynajuć rabicca absalutna nievytłumačalnyja rečy…

«Najmit Kuory» (Quarry)

Kryminalnaja drama, tryler. ZŠA, 1-y siezon

Adznaka na IMDB: 8,3 z 10

Sałdat Kuory viartajecca z Vjetnama paśla druhoj kamandziroŭki na vajnu. Jaho nie sustrakajuć kvietkami, nie ličać hierojem. Naadvarot, baćka prosić niejki čas nie źjaŭlacca doma, bo jamu budzie soramna pierad susiedziami. Mužčynu nichto nie biare na pracu, bo bajacca zaplamić reputacyju. Kuory padazrajuć u zabojstvach mirnaha nasielnictva, u tym liku dziaciej.

Heta typaž padobny da hierojaŭ «Cynkavych chłopčykaŭ» Aleksijevič. Jon vajavaŭ, bo ličyŭ, što heta patrebna krainie. Ale zamiest padziaki atrymlivaje tolki plaŭki ŭ śpinu. Tolki vielmi sumnieŭnyja piersanažy prapanujuć Kuory pracu najomnaha zabojcy. Spačatku sałdat admaŭlaje, ale pahadžajecca jahony bližejšy siabra i sasłužboviec.

Heta zahadkavy amierykanski poŭdzień. Miemfis, štat Tenesi. Piać hadoŭ pierad hetym tut zabili Marcina Lutara Kinha. I ciapier kvasnyja patryjoty vystupajuć suprać taho, kab čarnaskuryja vučylisia ŭ adnych škołach ź biełymi. Pytańnie adnosin pamiž rasami staić vielmi vostra.

«Najmit Kuory» — heta nie samy imklivy sieryjał, padziei iduć dastatkova marudna. Adnak tut cikava inšaje: što ž robicca ŭ dušy čałavieka, prafiesija jakoha zabivać.

«Čans» (Chance)

Psichałahičny tryler. ZŠA, 1-y siezon

Adznaka na IMDB: 8,2 z 10

Doktar Chaŭs viarnuŭsia! Nie zusim tak, viarnuŭsia akcior Chju Łory, jaki vykanaŭ rolu ŭsimi lubimaha Chaŭsa. Na hety raz piersanaž Łory znoŭ doktar — psichanieŭrołah z San-Francyska Ełdan Čans. Jon pracuje ź ciažkimi vypadkami psichałahičnych rasstrojstvaŭ.

Jahonaje žyćcio mianiaje miłaja błandzinka Žaklin — u jaje adbyłosia razdvajeńnie asoby paśla vypadkaŭ chatniaha hvałtu. Žaklin nibyta padaje sihnały tryvohi i prosić jaje vyratavać.

Nie čakajcie ad Ełdana Čans cynizmu i žartaŭ na miažy foła, jak było ŭ «Chaŭsie». Heta zusim inšy piersanaž, jakoha rvuć znutry sumnievy i niaŭpeŭnienaść. Jon znachodzicca ŭ skaładanych maralnych vybarach. A ŭ žyćci Čansa niamała tajamnic.

«Pryznačany pierajemnik» (Designated Survivor)

Palityčny tryler. ZŠA, 1-y siezon

Adznaka na IMDB: 8,1 z 10

Apakaliptyčnaja karcina: terarystami da rešty źniščany vašynhtonski Kapitolij. U budynku zahinuŭ prezident ZŠA, a taksama ŭsie parłamientary i ŭradoŭcy. Na takija vypadki ŭ patajemnaje miesca vyvoziać adnaho člena ŭrada, jaki i stanovicca kiraŭnikom ZŠA, kali inšyja pretendenty nie ŭ stanie zaniać pasadu. Takoha čałavieka nazyvajuć «naznačanym pierajemnikam».

U noč źniščeńnia Kapitolija takim čałaviekam staŭ ministr žyllovaha budaŭnictva i haradskoha raźvićcia Tom Kirkman. Jon absalutna ničym nie vybitny čynoŭnik, u jaho niama palityčnych ambicyj. Kirkmana słužby biaśpieki pryvoziać pozna ŭnačy ŭ Bieły Dom, dzie jon prynosić prysiahu prezidenta ZŠA.

Kraina ŭ chaosie, nichto nie biare na siabie adkaznaść za terakt, buntuje štat Mičyhan, vajskoŭcy niepadkantrolnyja, razabracca va ŭsich chitraściach sistemy Kirkmanu budzie niaprosta.

Varta asobna adznačyć vydatnuju ihru vykanaŭcy hałoŭnaj roli Kifiera Sazierlenda.

«Luk Kiejdž» (Luke Cage)

Supierhierojski bajavik. ZŠA, 1-y siezon

Adznaka na IMDB: 8,0 z 10

U panteonie amierykanskich hierojaŭ papaŭnieńnie. Sustrakajcie, znajomciesia, lubicie — Luk Kiejdž. Heta dvuchmietrovy zdaraviak-afraamierykaniec, jakoha nie biaruć kuli. Jany prosta adskokvajuć ad jaho, jak tenisny miačyk ad ścienki. Kiejdž nabyŭ svaje zdolnaści dziakujučy… stop, heta spojlery.

Kiejdž pracuje prybiralščykam u nievyraznym barbier-šopie ŭ ńju-jorkskim Harlemie. Abmiarkoŭvaje sa svaim načalnikam hulni baskietbalistaŭ «Niks», a pa viečarach padpracoŭvaje myćciom posudu. Luk nie choča vysoŭvacca, i na heta ŭ jaho jość tysiača pryčyn.

Na dolu Luka Kiejdža vypadzie «ačystka» Harlema ad bandyckich kłanaŭ. Za im buduć palavać usie — i palicyja, i hanhstery. «Ja nie hieroj», — paŭtaraje Kiejdž amal kožnuju sieryju. Jon nie choča być hierojem, ale budzie.

Клас
0
Панылы сорам
0
Ха-ха
0
Ого
0
Сумна
0
Абуральна
1

Chočaš padzialicca važnaj infarmacyjaj ananimna i kanfidencyjna?