Hramadzianskaja kampanija «Havary praŭdu» buduje ambicyjnyja płany na 2020 hod, u jaki mohuć adbycca i prezidenckija, i parłamienckija vybary. Pra heta było zajaŭlena 12 listapada na forumie arhanizacyi ŭ Minsku.

U pryvatnaści, kiraŭnik Viciebskaj abłasnoj arhanizacyi «Havary praŭdu» Lidzija Sahidulina pryviała kolkasnyja pakazčyki, jakich maje namier dasiahnuć kampanija. Pavodle jaje słoŭ, płanujecca stvaryć struktury arhanizacyi ŭ 50 haradach, sfarmavać inicyjatyŭnuju hrupu pa vyłučeńni kandydata ŭ prezidenty ŭ składzie piaci tysiač čałaviek, padrychtavać 50 jakasnych kandydataŭ u deputaty, stvaryć 150-tysiačnuju bazu prychilnikaŭ mirnych pieramienaŭ i kampanii «Havary praŭdu», navučyć i pryciahnuć da nazirańnia za vybarami 2.000 čałaviek.

U stratehii kampanii da 2020 hoda adznačajecca, što kanfihuracyja palityčnaha pola ŭ Biełarusi ŭskładniajecca, a tamu «tradycyjna zvykły, prosty padzieł na «čornaje/biełaje» ŭ supraćstajańni «ŭłada/apazicyja» bolš pracavać nie moža». Budučynia, ličać u kampanii, za prasoŭvańniem kankretnych intaresaŭ u miežach roznych sajuzaŭ.

Misijaj «Havary praŭdu» ŭ stratehii zajaŭlena «pabudova na nacyjanalnym dyjałohu i hramadzianskim kansensusie niezaležnaj, demakratyčnaj, paśpiachovaj Biełarusi». Pry hetym «vyśpiavańnie siaredniaha kłasa i hramadzianskaj supolnaści» ŭ dakumiencie nazyvajecca klučavym elemientam u raźvićci krainy.

Važnaj zadačaj dla dasiahnieńnia hetaj mety, ličać u «Havary praŭdu», ź`iaŭlajecca stvareńnie palityčnaj siły, zdolnaj mieć pastajannuju elektaralnuju padtrymku nie mienš za 20% vybarščykaŭ, jakaja budzie pryznanaja ŭnutry i pa-za krainaj. Dziakujučy hetamu pradstaŭniki hetaj palityčnaj siły, adznačajuć u kampanii, zmohuć uvajści ŭ skład urada, jaki budzie ŭdzielničać u padrychtoŭcy rynkavych i demakratyčnych pieraŭtvareńniaŭ.

U suviazi z mahčymym źmianieńniem vybarčaj sistemy stratehija praduhledžvaje nieabchodnaść pryniaćcia rašeńnia ab padrychtoŭcy da transfarmacyi ŭ palityčnuju partyju. Hety praces moža zaniać paŭtara-dva hady.

Hramadzianskaja kampanija «Havary praŭdu» była stvoranaja ŭ pačatku 2010 hoda z metaj spryjać «uśviedamleńniu biełaruskim hramadstvam realnaha stanovišča ŭ krainie, dzie mała praŭdy i šmat chłuśni». U tym ža hodzie kiraŭnik kampanii Uładzimir Niaklajeŭ byŭ vyłučany kandydatam u prezidenty Biełarusi.

Niaklajeŭ kiravaŭ kampanijaj «Havary praŭdu» da pačatku krasavika 2015 hoda, kali abviaściŭ pra vychad z apazicyjnych struktur u suviazi ź biezvynikovaściu dvuchhadovych pieramovaŭ pa vyłučeńni adzinaha demakratyčnaha kandydata ŭ prezidenty i vyznačeńni sumiesnaj prahramy na prezidenckija vybary 2015 hoda.

28 maja minułaha hoda na respublikanskim schodzie aktyvu «Havary praŭdu» staršynioj kampanii byŭ abrany Andrej Dźmitryjeŭ, a kandydatam u prezidenty na vybarach 2015 hoda ad kampanii vyłučyli Taćcianu Karatkievič. Ciapier Dźmitryjeŭ i Karatkievič ź`iaŭlajucca sustaršyniami arhanizacyi.

Kampanija «Havary praŭdu» rabiła čatyry sproby aficyjna zarehistravać arhanizacyju ŭ Ministerstvie justycyi (u 2010 2011, 2013 i 2015 hadach), ale ŭsie jany byli niaŭdałymi. U «Havary praŭdu» ličać admovy ŭ rehistracyi «palityčna matyvavanymi».

Pavodle słoŭ Andreja Dźmitryjeva, ciapier u kampanii «Havary praŭdu» kala 700 čałaviek. Choć «žorstki ŭlik» aktyvistaŭ arhanizacyi nie viadziecca.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?