Alaksandra Hierasimienia. Fota Tribuna.com
— Ja nie chaču kamientavać artykuł i vykazvańni byłoha treniera zbornaj Biełarusi pa płavańni, tamu što ŭsio, pačynajučy ad pieršych słoŭ, łuchta sabačaja, — skazaŭ bijaenierhietyk SPORT.TUT.BY. — Zło złom nie lečycca, ja nie chaču ŭ adkaz napadać na jaho. Manceviča zaprašali ŭ zbornuju vyratavać biełaruskaje płavańnie. Jon «vyratavaŭ» i ciapier uziaŭsia ratavać Sašu. Ź dziacinstva kazali, što apraŭdvajecca vinavaty. Ja nie chaču hetaha rabić.
Kaśjanienka nie staŭ niejak vyznačać svaju dziejnaść, ale zapeŭniŭ, što heta dakładna nie šamanstva:
— Ja nie nazyvaju siabie śpiecyjalistam pa bijaenierhietycy, heta ŭsio adnosna. Ja b nazvaŭ svaju dziejnaść bijaenierhietyčnaj psichałahičnaj pracaj. U hetaj spravie isnuje šmat technałohij. Ale maje mietodyki absalutna nie majuć dačynieńnia da šamanstva. Amierykanski piśmieńnik Karłas Kastanieda ŭ niekalkich tamach apisaŭ, što takoje šamanizm. Kali kazać u dvuch słovach, to heta praca daloka nie «pa-śvietłamu». Bieź viery i bieź vieravučeńnia nikoli nie budzie radaści. Nazyvać mianie šamanam — heta toje ž samaje, jak abzyvać prafiesijnaha žurnalista pisakam. Ja nijaki nie šaman.
Bijaenierhietyk admoviŭsia apisvać ŭ detalach technałohiju svajoj pracy, ale raspavioŭ pra niekatoryja jaje pryncypy:
— Ja raspracoŭvaju enierhietyčnyja prahramy, kab asoba mahła zdabyć bałans. Čałaviek — heta nie prosta kavałak miasa. Jon składajecca siarod inšaha z tonkich ciełaŭ. Važna padtrymlivać usio ŭ bałansie, uraŭnavažvać enierhacentry. Kampjutar nie pačnie dobra pracavać, pakul jaho nie naładzić. Dakładna hetak ža i z arhanizmam čałavieka. Ja liču, što mientalnaja, psichałahičnaja padrychtoŭka — heta pieršasny płast. A na jaho napłastoŭvajecca fizičnaja, jakoj kiruje trenier. Jak možna biezdakorna vykanać techničny bok, kali spartoviec nie nastrojeny naležnym čynam psichałahična?
Kaśjanienka upeŭnieny, što zbornyja roznych krain źviartajucca da dapamohi bijaenierhietyki, prosta nie afišujuć hetaha, kab nie raskryvać sakrety padrychtoŭki:
— Napiaredadni surjoznych spabornictvaŭ niervy ŭ spartoŭcaŭ naciahnutyja, jany majuć patrebu ŭ dapamozie śpiecyjalistaŭ pa psichałohii. Byvaje, što trenier kaža: «Spartoviec mianie nie čuje, ja nie mahu da jaho dahrukacca». A adbyvajecca heta, tamu što mientalna čałaviek znachodzicca ŭ adnym miescy, emacyjna — u inšym, a fizična — u trecim. Pra što dumaje kanatachodziec, kali pieraadolvaje šlach? A ni pra što: kali jon pra niešta dumaje, to dakładna ŭpadzie.
Ja nidzie nie śviačusia, tamu što nie chaču padstaŭlać svaich klijentaŭ. Ja mahu raskazać vam pryncypy svajoj pracy, ale klijentaŭ nie vydam, tamu što jość peŭnaja etyka. Publikacyi na hetuju temu vystaŭlajuć Alaksandru Hierasimieniu ŭ niapravilnym śviatle. A jana prystojny, valavy, charyzmatyčny i surjozny čałaviek, i ja vielmi pavažaju jaje jak asobu.
