«Čytajem pa-biełarusku z velcom». Ź litaraturaj znajomić biełaruski akcior i televiadoŭca Juryj Žyhamont. Fota budzma.by
U škoły i himnazii Hrodna, Lidy, Słonima, Vaŭkavyska, Smarhoni i Navahrudka pryjeduć viadomyja biełaruskija piśmieńniki i televiadoŭcy.
Śpiecyjalny ŭrok prajekta adbudziecca ŭ hrodzienskim Novym zamku 16 listapada i budzie pryśviečany 125-hodździu z dnia naradžeńnia kłasika biełaruskaj litaratury Maksima Bahdanoviča, jakoje adznačajecca 9 śniežnia. Na ŭroku dla małodšych školnikaŭ viadomyja hrodziency prahartajuć staronki bijahrafii Maksima Bahdanoviča i pračytajuć jaho vieršy. U horadzie nad Niomanam kłasik biełaruskaj litaratury pražyŭ niekalki hadoŭ.
Za hod isnavańnia prajekta «Čytajem pa-biełarusku z velcom», jaki realizujecca pry padtrymcy Ministerstva adukacyi, niezvyčajnyja interaktyŭnyja ŭroki prajšli ŭ 80 škołach Minska, Homielščyny i Brestčyny.
Pastajannymi nastaŭnikami na takich urokach dla vučniaŭ 2—3-ch kłasaŭ vystupajuć piśmieńniki, paety i akciory: Uładzimir Lipski, Raisa Baravikova, Juryj Žyhamont, Alena Masła, Natalla Bučynskija. Taksama nastaŭnikami prajekta časta stanoviacca biełaruskija spartsmieny, akciory i televiadučyja.
«Z prajektam «Čytajem pa-biełarusku z velcom» ja znajomy, — adznačyŭ dyrektar Hrodzienskaha dziaržaŭnaha historyka-archieałahičnaha muzieja Juryj Kiturka. — Radasna sustrakać jaho i ŭ Hrodnie. Mety jaho zrazumiełyja i prostyja.
Pryśviacić urok Maksimu Bahdanoviču abo jakomu-niebudź inšamu litarataru — biezumoŭna, udałaja sproba paznajomić dziaciej z tvorčaściu kłasika abo sučaśnika. Spadziajusia, mnohija dzieci praniknucca, zacikaviacca i buduć pamiatać hetu padzieju. Tamu takija prajekty pavinny być. Prosta tamu, što jany vyznačajuć nas jak nacyju, vyznačajuć biełaruskuju samaidentyčnaść».
Čakajecca, što da kanca 2016/2017 navučalnaha hoda ŭ respublikanskim prajekcie «Čytajem pa-biełarusku z velcom» voźmuć udzieł kala 150 škoł i bolš za 20 tys. vučniaŭ pa ŭsioj Biełarusi. Arhanizatary kampanii adhukajucca na zapyty ab praviadzieńni ŭrokaŭ ad ustanoŭ adukacyi. Tak, u Hrodzienskaj vobłaści kamanda prajekta naviedaje sielskuju biełaruskamoŭnuju škołu ŭ ahraharadku Kvasoŭka.
