Hałoŭny trenier zbornaj Biełarusi pa futbole Alaksandr Chackievič daŭ vialikaje intervju partału by.tribuna.com. Jon zajaviŭ, što ličyć Krym častkaj Ukrainy, i raskazaŭ, što na hetaj hlebie pasvaryŭsia sa svajoj maci.

— Ja kažu toje, što dumaju. Heta moj punkt hledžańnia. Čamu ja nie mahu jaho vykazać? Čamuści naš biełaruski mientalitet pracuje ŭ takich momantach pa-inšamu. Nie viedaju, čamu tak. Moža, sprava ŭ hetym televizary? Usio idzie adtul. Kali pryjazdžaju da mamy, prašu jaje pierš za ŭsio vyklučyć televizar. Tamu što tam uvieś čas naviny, niejkija pieradačy: chto z kim-niebudź što-niebudź zrabiŭ, usio heta raźbirajecca. Kažu: «Mama, ja pryjechaŭ, davaj pra dziaciej pahavorym».

Niadaŭna voś iznoŭ mama raspaviadała, jak va Ukrainie skrali niejkaje dzicia, pra niejkaha milicyjanta, jaki niešta tam stvaryŭ u Daniecku, u DNR, jašče niedzie. Prapanavaŭ adklučyć rasijskija kanały, ustalavać spadarožnikavuju talerku, naładzić ukrainskija kanały i pahavaryć pra heta praź miesiac. Mierkavańnie źmienicca.

— Vy starajeciesia na hetyja temy nie razmaŭlać?

— My z mamaj adzin raz navat pasvarylisia na hetaj hlebie. Skazaŭ: «Nie chaču navat prychodzić. Tamu što ty mianie tut chočaš pierakanać, što va Ukrainie ŭsio banderaŭcy i jaduć ludziej». Majoj siamji tam kamfortna žyć. Kali b z hetym byli niejkija pytańni, to ja, napeŭna, pamianiaŭ by miesca žycharstva, tak? Mahčymaści jość. Na chudy kaniec mahu siudy viarnucca. Čałaviek dzie žyvie? Tam, dzie jamu dobra. Mnie dobra va Ukrainie.

— Dadatkovuju situacyju ŭ Biełarusi z mamaj abmiarkoŭvajecie? U navinach kažuć, što ŭ nas tut usio kvitnieje i pachnie.

— Dyk ja i sam časta byvaju, usio baču. Što tyčycca navinaŭ, to mnie heta nie cikava. Ja joj pryvioŭ prykład ź Juryjem Sanyčam. U televizary taksama raskazvali, što jon bieh na chutkaści 200 kiłamietraŭ u hadzinu ŭ bok kitajskaj miažy. I narod u heta vieryć. U navinach kažuć toje, što ludzi chočuć čuć. Jany ŭžo nibyta bačać adnu karcinku, ale pasłuchajuć naviny — i ŭsprymańnie źmianiajecca. Raptam toje, što ty bačyš kožny dzień na svaje vočy, — heta prosta padałosia? Tak i žyviom.

Клас
0
Панылы сорам
0
Ха-ха
0
Ого
0
Сумна
0
Абуральна
0