Bahataja tradycyjami ŭ halinie vajskovaj pramysłovaści Čechija prymaje na ŭzbrajeńnie šturmavuju vintoŭku CZ806 BREN 2, paviedamiŭ partał czech-army. Pastaŭki novaj zbroi, vyrablenaj kampanijaj Ceska Zbrojovka, armiejskim padraździaleńniam užo pačalisia.
Šturmavaja vintoŭka pad patrony NATA była raspracavana ŭ 2015 hodzie dla zamieny aŭtamata CZ 805 BREN, jaki źjaviŭsia ŭ 2011 hodzie. Adnak papiaredniaja viersija vintoŭki vyklikała skarhi vajskoŭcaŭ z-za svajho vysokaha koštu, vialikaj masy i habarytaŭ, drennaha bałansu padčas stralby, składanaj pracedury čystki.
Novaja vintoŭka važyć na paŭkiłahrama mieniej — kala 3,3 kh. Jak paviedamlajecca, inžyniery vypravili i inšyja chiby CZ 805 BREN.
Vintoŭka maje modulnuju kampanoŭku - možna chutka pamianiać rulu na bolš karotkuju ci bolš doŭhuju i ciažkuju u zaležnaści ad zadačy.
Takim čynam adna vintoŭka moža mieć 4 madyfikacyi - karabin (karotkuju rulu), standartnuju, doŭhuju (dla padvyšanaj trapnaści stralby) i «kulamiotnuju» (ź ciažkaj rulaj i mahčymaściu bolš praciahłaj efiektyŭnaj stralby čerhami).
Mahaziny vyrablajucca z prazrystaha płastyku, što daje mahčymaść zaŭsiody lohka kantralavać kolkaść patronaŭ, jakija zastalisia.
Čechija jašče ŭ časy Varšaŭskaj damovy była ŭ sacyjalistyčnym błoku adzinaj krainaj, jakaja mieła na ŭzbrajeńni strałkovuju zbroju ŭłasnaj raspracoŭki, a nie kłon savieckaha AK-47.
