U Viciebskim abłasnym sudzie 1 śniežnia pastanoŭleny pryhavor pa spravie byłych słužbovych asob Navapołackaha AAT «Naftan».
Jak paviedamiła načalnik adździeła arhanizacyjnaha zabieśpiačeńnia sudovaj dziejnaści abłsuda Natalla Płatonienka, były hiendyrektar pa materyjalna-techničnym zabieśpiačeńni «Naftana» abvinavačvajecca va ŭčynieńni złačynstvaŭ, praduhledžanych č. 3 art. 424 KK, č. 1 art. 14 i č. 3 art. 424 KK, č. 3 art. 430 KK (złoŭžyvańnie ŭładaj, zamach na złoŭžyvańnie ŭładaj abo słužbovymi paŭnamoctvami, atrymańnie chabaru ŭ asabliva bujnym pamiery), były načalnik upraŭleńnia vytvorča-techničnaj kamplektacyi pradpryjemstva — č. 3 art. 424 KK, č. 1 art. 14 i č. 3 art. 424 KK, č. 3 art. 430 KK, były načalnik adździeła kamplektacyi AAT «Naftan» — č. 3 art. 424 KK, č. 1 art. 14 i č. 3 art. 424 KK, č. 2 art. 430 KK, č. 3 art. 430 KK.
Nahadajem, pavodle dadzienych śledstva, namieśnik hiendyrektara i dvoje jaho padnačalenych u metach atrymańnia materyjalnaj vyhady ŭ červieni 2011 hoda ŭvajšli ŭ złačynnuju zmovu z tryma pradstaŭnikami kamiercyjnych struktur. Sutnaść supraćpraŭnaj dziejnaści zaklučałasia ŭ atrymańni chabaraŭ za akazańnie dapamohi ŭ zaklučeńni kantraktaŭ z AAT «Naftan».
Pry zaklučeńni adnaho z kantraktaŭ u lutym 2013 hoda abvinavačvanyja mieli namier atrymać paśla ažyćciaŭleńnia ździełki bolš za 900 tys. jeŭra, adnak nie zmahli davieści svoj złačynny namier da kanca, bo byli zatrymanyja apieratyŭnymi supracoŭnikami MUS.
Usiaho ž u vyniku zaklučanych kantraktaŭ pa nieabhruntavanym košcie AAT «Naftan» byŭ naniesieny ŭron bolš čym na 46 młrd rubloŭ, a suma chabaraŭ słužbovym asobam skłała bolš za 240 tys. jeŭra.
Padčas papiaredniaha rasśledavańnia pryniatyja śledstvam miery dali mahčymaść pakryć naniesienuju pradpryjemstvu škodu na sumu bolš za 38 młrd rubloŭ.
Hałoŭnaha fihuranta pa sukupnaści złačynstvaŭ sud pryhavaryŭ da 12 hadoŭ pazbaŭleńnia voli z kanfiskacyjaj majomaści i pazbaŭleńniem prava zajmać pasady, źviazanyja z vykanańniem arhanizacyjna-rasparadčych i administracyjna-haspadarčych abaviazkaŭ, a taksama źviazanyja z praviadzieńniem jurydyčna značnych dziejańniaŭ, na termin piać hadoŭ, z adbyvańniem pakarańnia ŭ papraŭčaj kałonii va ŭmovach ŭzmocnienaha režymu.
Druhomu fihurantu pryznačana dzieviać hadoŭ pazbaŭleńnia voli z kanfiskacyjaj majomaści i pazbaŭleńniem prava zajmać pasady, źviazanyja z vykanańniem arhanizacyjna-rasparadčych i administracyjna-haspadarčych abaviazkaŭ, a taksama źviazanyja z praviadzieńniem jurydyčna značnych dziejańniaŭ, na termin piać hadoŭ, z adbyvańniem pakarańnia ŭ papraŭčaj kałonii va ŭmovach ŭzmocnienaha režymu.
Treciamu — siem hadoŭ pazbaŭleńnia voli z kanfiskacyjaj majomaści i pazbaŭleńniem prava zajmać pasady, źviazanyja z vykanańniem arhanizacyjna-rasparadčych abaviazkaŭ, a taksama źviazanyja z praviadzieńniem jurydyčna značnych dziejańniaŭ, na termin piać hadoŭ, z adbyvańniem pakarańnia ŭ papraŭčaj kałonii va ŭmovach uzmocnienaha režymu.
Sud pastanaviŭ spahnać na karyść AAT «Naftan» z troch abvinavačvanych u salidarnym paradku ŭ jakaści kampiensacyi škody, naniesienaj złačynstvam, 2,182 młn rubloŭ (denaminavanych).
Na karyść dziaržavy abvinavačvanyja pavinny vypłacić bolš za 400 tys. rubloŭ. Najbolšuju sumu — kala 208 tys. rubloŭ — były namieśnik hiendyrektara.
Prysud zakonnuju moc nie nabyŭ, moža być abskardžany i apratestavany ŭ apielacyjnym paradku ŭ Viarchoŭnym sudzie.
