Niaŭdały zapusk i nastupnaje padzieńnie kaśmičnaha karabla «Prahres MS-04» źviazanyja ź niajakasnaj zborkaj ruchavika treciaj stupieni rakiety-nośbita «Sajuz-U». Pra heta RIA «Novosti» raspaviała krynica ŭ kaśmičnaj halinie.
Surazmoŭca ahienctva rastłumačyŭ, što kančatkovyja vysnovy možna budzie zrabić tolki paśla madelavańnia na stendzie z vyvučeńniem atrymanaj telemietryi. Jon zaŭvažyŭ, što kali viersija paćvierdzicca, to pryjdziecca zdymać i paŭtorna praviarać usie ruchaviki, ustalavanyja na anałahičnych nośbitach.
«Chutčej za ŭsio, pa vynikach rasśledavańnia dziaržkamisija ŭ čarhovy raz budzie vymušana kanstatavać vyjaŭleny fakt niajakasnaj zborki ruchavika RD-0110, a stendavaje madelavańnie, jakoje budzie praviedziena paśla analizu najaŭnaj telemietryi, pakaža, jaki mienavita kampanient ruchalnaj ustanoŭki byŭ zrobleny z parušeńniami», — skazaŭ surazmoŭca ahienctva.
Hruzavy karabiel «Prahres» startavaŭ z Bajkanura viečaram 1 śniežnia, jon pavinien byŭ dastavić na Mižnarodnuju kaśmičnuju stancyju paliva, vadu, pradukty charčavańnia, miedykamienty i navukovaje abstalavańnie. Na siomaj chvilinie palotu z karabla pierastali pastupać telemietryčnyja dadzienyja. Praź niekalki hadzin «Prahres» uvajšoŭ u ščylnyja słai atmaśfiery i zhareŭ.
