ŚCIAPAN STUREJKA «ŠTO NIE TAK Z ARCHITEKTURNAJ SPADČYNAJ? NA PAROZIE PIERAVAROTU»
9 śniežnia, 18.30, halereja Ŭ (pr-t Niezaležnaści, 37a)
«Pomnik historyi i architektury, achoŭvajecca dziaržavaj» — źjaŭleńnie takoj šyldy na budynku nie tolki nadaje jamu inšy status, rehłamientuje prapisanyja zakonam praviły karystańnia, pavodzinaŭ, ale asablivym čynam źmianiaje samu haradskuju prastoru, haradskoje asiarodździe. Daloka nie zaŭsiody heta idzie na karyść horadu, a časam naadvarot — restaŭracyja, kansiervacyja ci adnaŭleńnie «pomnika historyi» zaminaje haradskomu raźvićciu. Kali raniej status «pomnika» nadavaŭsia tolki «vybitnym dasiahnieńniam» epochi, to zaraz ekśpierty źmianiajuć optyku i znachodziać unikalnaść u typovych pabudovach. A heta značyć, što pa miery paśladoŭnaha ŭśviedamleńnia kaštoŭnaści budynkaŭ papiarednich epoch kolkaść histaryčnych pomnikaŭ budzie niepaźbiežna raści. Ci nie stamiłasia ŭžo čałaviectva ad kansiervacyi? Adnačasova z zachavańniem aŭtentyčnych abjektaŭ maje miesca i praces uznaŭleńnia ŭžo nie isnujučych pomnikaŭ — pavodle ich histaryčnych uzoraŭ. Pryčym takija «dublikaty» nie abaviazkova majuć pryviazku da histaryčnaha miesca isnavańnia, mohuć uźnikać dzie zaŭhodna. Bum pomnikaŭ, industryja zabaŭ i turyzmu, technałahičny pieravarot, hłabalnyja adnosiny i pop-kultura imkliva zvodziać spadčynu z zony nacyjanalnaha intaresu i ekśpiertnaha pola. Ale kudy pryvodziać?
Siońnia stanovicca zrazumiełym, što našy pomniki i našy adnosiny ź imi bolš nie mohuć być raniejšymi. Što nie tak z architekturnaj spadčynaj? Nakolki adekvatnaja kłasičnaja kancepcyja pomnika novym umovam? I ci varta nam u Biełarusi admachvacca ad novaha razumieńnia spadčyny, praciahvajučy hnacca za miražami achovy pomnikaŭ?
Latučy ŭniviersitet i Mižnarodny kansorcyum «JeŭraBiełaruś» u miežach cykła «Ujaŭlajučy Biełaruś: idei i vobrazy dla supolnaj budučyni» zaprašajuć na publičnuju pramovu historyka, kulturnaha antrapołaha Ściapana Sturejki. Lekcyja «Što nie tak z architekturnaj spadčynaj? Na parozie pieravarotu» adbudziecca 9 śniežnia a 18.30 u halerei Ŭ (pr-t Niezaležnaści, 37a). Uvachod volny!
Anonsy i videazapisy ŭsich publičnych lekcyj Latučaha ŭniviersiteta možna znajści na sajcie: www.fly-uni.org