Prezident Ukrainy Piatro Parašenka i prezident Polščy Andžej Duda vykazali abureńnie rašeńniem Jeŭrakamisii, jakoje adkryvaje mahčymaści dla «Hazproma» pavialičyć abjomy pastavak hazu ŭ Jeŭropu ŭ abychod Ukrainy.
Pra heta havorycca ŭ sumiesnaj zajavie prezidentaŭ, pryniataj pa vynikach pieramovaŭ 2 śniežnia ŭ Varšavie, piša «Interfaks-Ukraina».
«Ukraina i Polšča byli šakavanyja rašeńniem Jeŭrakamisii ad 28 kastryčnika 2016 hoda, jakoje adkryvaje mahčymaści dla «Hazproma» pavialičyć abjomy pastavak hazu ŭ Jeŭropu ŭ abychod Ukrainy», — havorycca ŭ sumiesnaj zajavie prezidentaŭ.
U zajavie havorycca, što «rašeńnie JEK pa hazapravodzie OPAL padryvaje stratehiju enierhietyčnaj biaśpieki ES, stvaraje pahrozu dla enierhietyčnaj biaśpieki krain Centralnaj i Uschodniaj Jeŭropy».
Akramia taho, u zajavie kiraŭniki dziaržaŭ adznačajuć, što heta rašeńnie padryvaje pryncyp, jaki ŭtrymlivajecca ŭ Dahavory ab stvareńni Enierhietyčnaj sadružnaści i praviłach kankurencyi.
«Jano stvaraje realnyja ryzyki dla bieśpierapynnych pastavak hazu pamiž Polščaj i Ukrainaj i istotnaha pieranakiravańnia najaŭnych hazavych patokaŭ pamiž inšymi krainami», — havorycca ŭ zajavie.
Parašenka i Duda adznačajuć, što heta rašeńnie ŭmacuje pieravahu RF i tym samym parušyć kankurencyju.
«Hetaje rašeńnie taksama zakładvaje asnovy dla budaŭnictva hazapravoda «Paŭnočny patok-2», vynikam čaho moža stać razbureńnie HTS Ukrainy, dalejšaje parušeńnie praviłaŭ kankurencyi i značnaje pavieličeńnie ceny na haz dla spažyŭcoŭ», — havorycca ŭ dakumiencie.
Prezidenty adznačajuć, što hetaje rašeńnie taksama supiarečyć sankcyjnaj palitycy Jeŭrasajuza, bo stymuluje dadatkovyja hrašovyja pastupleńni ŭ RF, adnačasova abmiažoŭvajučy prybytak Ukrainy ad tranzitu hazu.
«My ličym, što hetaje rašeńnie pavinna być pierahledžanaje, choć i razumiejem, jakim składanym i balučym krokam heta moža być», — adznačyli Parašenka i Duda.
U kancy kastryčnika Jeŭrakamisija dazvoliła «Hazpromu» pavieličeńnie dastupnaj jamu mahutnaści na prapampoŭku hazu pa hazapravodzie OPAL, jaki abjadnoŭvaje Paŭnočny patok z hazatranspartnaj sistemaj Centralnaj i Zachodniaj Jeŭropy. Rasijskamu manapalistu raniej byli dastupnyja tolki 50% mahutnaści hazapravoda.
Rašeńnie ES dazvoliła rasijskaj kampanii atrymać dostup jašče da 32% mahutnaści truby i tym samym naraścić ekspart pa hetamu kanału ŭ abychod Ukrainy bolš čym na 9 młrd kubamietraŭ hazu.
Andrej Kobaleŭ, staršynia praŭleńnia NAK Naftahaz Ukrainy, zajaviŭ, što dostup «Hazproma» da OPAL moža pamienšyć tranzitnuju vyručku Ukrainy ad prapampoŭki hazu na sumu ad 290 młn dalaraŭ da 425 młn dalaraŭ.
