Sud Bresckaha rajona 2 śniežnia vynies prysud 55-hadovamu fiermieru Mikałaju Bielčuku ź vioski Arlanka Małaryckaha rajona za hvałt u dačynieńni da inśpiektara DAI.
Fiermier pryznany vinavatym va ŭčynieńni złačynstva, praduhledžanaha art. 364 KK (hvałt u dačynieńni da supracoŭnika orhanaŭ unutranych spraŭ) i pryhavorany da dvuch miesiacaŭ aryštu. Sud zaličyŭ čas utrymańnia abvinavačvanaha pad vartaj z 12 kastryčnika pa 1 śniežnia ŭ termin pryznačanaha pakarańnia.
Prysud nie nabyŭ zakonnuju moc i moža być abskardžany.
Mikałaj Bialčuk abvinavačvaŭsia ŭ tym, što 9 maja 2014 hoda z 18.30 da 18.40 u dvary doma pa vulicy Palavoj u vioscy Stradzičy Bresckaha rajona sumiesna sa svaim bratam učyniŭ hvałt u dačynieńni da inśpiektara darožna-patrulnaj słužby DAI Bresckaha RAUS.
Toj prybyŭ dla razboru pa paviedamleńni ab učynieńni administracyjnaha pravaparušeńnia: syn Mikałaja Bielčuka kiravaŭ samarobnym niezarehistravanym i niezastrachavanym traktaram na adnoj z vulic vioski.
Jak vynikała z abvinavačańnia, kab paźbiehnuć pakarańnia, mužčyny sprabavali schavać traktar. Na zakonnyja patrabavańni supracoŭnika DAI spynić supraćpraŭnyja dziejańni adreahavali ahresiŭna. Brat Mikałaja Bielčuka niekalki razoŭ udaryŭ kułakami inśpiektara. Kali toj utrymlivaŭ napadnika, da ich padyšoŭ Mikałaj i ŭkusiŭ inśpiektara za tylnuju pavierchniu pravaj kiści.
U vyniku paciarpiełamu byli pryčynieny lohkija cialesnyja paškodžańni, jakija pryviali da karotkačasovaje rasstrojstva zdaroŭja.
Na sudovym pasiadžeńni Mikałaj Bialčuk nie pryznaŭ svajoj viny i zajaviŭ, što nie kusaŭ milicyjaniera. «My pryjechali z bratam Alaksandram z Arlanki na mašynie, paśla taho jak patelefanavaŭ moj syn Viktar i skazaŭ, što naš samarobny traktar buduć zabirać na štrafstajanku. Hety traktar vykarystoŭvajuć usie Bielčuki dla pracy ŭ ciaplicach, kali treba pieravozim jaho na pryčepie, — rastłumačyŭ Mikałaj Bialčuk. — Kali Alaksandr spytaŭ u supracoŭnika DAI, na jakoj padstavie hety traktar zabiaruć, toj uskipieŭ: što ty mnie tykaješ! Schapiŭ za hrudki Alaksandra, tuzanuŭ na kapot, potym padvioŭ da płota. Ja staŭ pamiž imi. Heta i na zdymkach vidać, ja prosta stajaŭ, kab brata nie bili».
Dapytany na sudovym pasiadžeńni supracoŭnik milicyi raskazaŭ svaju viersiju taho, što adbyłosia, i paćvierdziŭ pryčynieńnie jamu bratami Bielčukami cialesnych paškodžańniaŭ.
Mikałaj Bialčuk byŭ zatrymany 12 kastryčnika 2016 hoda i źmieščany ŭ SIZA. Tam jon 1 listapada pačaŭ haładoŭku.
Sud Bresckaha rajona pačaŭ razhladać spravu 23 listapada. Pry abjaŭleńni pierapynku na pieršym sudovym pasiadžeńni Bialčuk paviedamiŭ žurnalistam, što jon jaje praciahvaje.
Jak paviedamlali ŚMI, u studzieni 2015 hoda Alaksandr Bialčuk byŭ asudžany pa art. 364 KK na try miesiacy aryštu. Jon nie pryznaŭ viny i prysud abskardziŭ, ale biespaśpiachova.
