Biełaruski startap Scop zaviaršaje raspracoŭku miesendžara, jaki pavinien «pieraviarnuć ujaŭleńnie ab kamunikacyi ŭ internecie», piša Dev.by.
Akramia ŭbudavanych funkcyj raspaznańnia movy i emocyj pradukt dazvolić vykonvać ceły nabor apieracyj, jak prahlad videa, dakumientaŭ abo pošuk, nie pakidajučy miesendžara. «Ničoha padobnaha na rynku siońnia nie isnuje», — raspaviali zasnavalniki haradzienskaha prajekta Jaŭhien Ražko i Leanid Vaźniuk.
Kamanda Scop. Fota: Garage48.
Na mižnarodnym chakatonie Garage48, jaki prachodziŭ u kancy listapada ŭ Hrodnie, Scop pieramahli z prajektam mabilnaha miesendžara, u jakim tekstavaja kamunikacyja adbyvajecca pry dapamozie ałharytmu raspaznańnia movy i emocyj. Pryz pieramožcam (1000 dalaraŭ) padrychtavali tryumfatary letašniaha minskaha Garage48 — Jaŭhien Nieŭhień i Siarhiej Hančar. Tyja samyja zasnavalniki startapa Masquerade, jakija zavajavali mir i Marka Cukierbierha mabilnaj prahramaj MSQRD, što dazvalaje nakładvać raznastajnyja efiekty na videa i fota tvaraŭ karystalnikaŭ.
Pierajemnaść pamiž prajektami, jak akazałasia, isnuje nie tolki ŭ častcy pośpiechu na Garage48. Abodva startapy bačać budučyniu kamunikacyi ŭ internecie trochi šyrej, čym heta dazvalajuć dastupnyja siońnia pradukty.
Ideja Scop — skambinavać i maksimalna spraścić hałasavuju, videa i tekstavuju kamunikacyju, pašyryŭšy mahčymaści mabilnaha miesiedžynha cełym šeraham apieracyjaj, jakija my štodnia robim na svaich smartfonach z vykarystańniem roznych prahram i instrumientaŭ.
«Na Garage48 my prezientavali tolki častku vialikaha miechanizmu — uvod tekstu hołasam z kanviertavańniem emocyj na tvary ŭ smajły, — raspaviadaje CEO startapa Jaŭhien Ražko. — Adnak u hetym zaklučajecca kvintesiencyja ŭsiaho prajekta — stvaryć miesendžar, jaki maksimalna palahčaje kamunikacyju».
«My aptymizavali kožny krok karystalnika ŭ miesendžary»
Chłopcy adznačajuć, što siońnia miesendžary — adny z samych zapatrabavanych mabilnych prahram, da jakich karystalniki źviartajucca štodnia. Adnak usie asnoŭnyja hulcy na rynku «ŭžo daŭno nie ŭkaraniajuć inavacyj, a zajmajucca mikramieniedžmientam, nakštałt dadańnia stykieraŭ». Jak vynik, «zaapark miesendžaraŭ raście», a zručniej karystalnikam nie stanovicca.
«Adpravić paviedamleńnie, fota, videa — usio pa-raniejšamu krucicca vakoł hetych troch funkcyj. Adnak akramia hetaha my taksama abmieńvajemsia spasyłkami, hladzim videa, šukajem infarmacyju, płanujem sustrečy — i dla ŭsiaho hetaha nam davodzicca vychodzić za miežy miesiendžara, pieraklučacca na inšyja prahramyi pryłady, — kaža Jaŭhien Ražko. — My ž abjadnali dastupnyja technałahičnyja rašeńni, kab karystalnik moh zrabić usie zhadanyja vyšej apieracyi ŭnutry miesendžara — u adnym aknie — i ŭsiaho ŭ niekalki klikaŭ».
«Dla hetaha my pradumvali i maksimalna aptymizavali praktyčna kožny krok karystalnika. Hatovych rašeńniaŭ miesendžaraŭ, isnujučych na rynku, my staralisia paźbiahać», — adznačaje dyzajnier Scop Leanid Voźniuk.
«My stvarajem nie miesendžar — kamunikatar»
Interfiejs miesendžara maksimalna minimalistyčny. Unutry dyjałohu karystalnik atrymaje mahčymaść pry dapamozie adnaho palca (i roznaj praciahłaści i nakiravanaści ruchu-«tepa») i adnoj asnoŭnaj kłavišy vyrablać ceły šerah raznapłanavych apieracyj: kamunikavać, huhlić infarmacyju, prahladać videa i vobłačnyja dakumienty, naviedvać sajty i zanasić u kalandar sustrečy. Pryčym rabić usio heta ŭnutry adnaho dyjałohu abo ekrana.
«Mnohija siońnia karystajucca ŭ miesendžarach i čatach aŭdyjopaviedamleńniami, bo nadyktavać tekst chutčej, čym nadrukavać jaho, ale voś słuchać — u razy daŭžej, čym pračytać. Ukaranionaja ŭ naš miesiendžar technałohija raspaznańnia movy ad Apple dazvalaje kanviertavać vaš hołas u tekst z dakładnaściu da 80 pracentaŭ, što robić znosiny bolš dynamičnymi i niazmušanymi», — raspaviadaje Jaŭhien Ražko.
Inšaja aryhinalnaja technałohija raspaznańnia emocyj, raspracavanaja chłopcami z Bostana, daje mahčymaść adpraŭlać smajliki z dapamohaj adpaviednaj emocyi na vašym tvary.
«Ałharytm raspaznaje poł, vyznačaje ŭzrostavyja hrupy, dla kožnaj ź jakich my rychtujem vydatny nabor stykieraŭ. U pierśpiektyvie płanujem raspracoŭku piersanalizavanych smajlikaŭ», — paśviačaje ŭ płany Leanid Vaźniuk.
Haradziency padkreślivajuć, što vykarystoŭvajuć dastupnyja na rynku technałohii, ale rychtujuć praryŭ u ich užyvańni i kambinavańni.
«Faktyčna my pieravierniem ujaŭleńnie pra toje, jak vyhladaje miesendžar i što jon umieje. Naš padychod adkryvaje cudoŭnyja mahčymaści ŭ kamunikacyi. Naprykład, moža značna źnizić moŭny barjer, dazvalajučy dvum surazmoŭcam vieści razmovu na roznych movach, pry hetym repliki kožnaha ź ich buduć imhnienna pierakładacca na zrazumiełuju jamu movu», — kaža Jaŭhien.
«Možna skazać, što my adychodzim ad paniaćcia miesendžara. My stvarajem kamunikatar sa značna bolš šyrokim naboram funkcyj, čym va ŭsich prysutnych na rynku praduktaŭ, — dadaje Leanid. — Ni adzin miesendžar siońnia nie maje ŭsiaho taho, što jość u Scop».
«Jašče dva hady tamu my pakrucili b palcam la skroni»
Čamu pry dastupnych technałohijach nichto da hetaha času nie sabraŭ ich u adnym miesendžary?
«Stvareńniem i ŭkaranieńniem technałohij zajmajucca roznyja ludzi. Vynachodziačy niešta novaje, hiki časta pieraśledujuć čysta navukovyja mety. My hladzim na technałohii ź inšaj pazicyi, dumajučy nad novymi mahčymaściami ich prymianieńnia», — tłumačyć Leanid.
Pa słovach Jaŭhiena, kab vyjści na zvyškankurentny rynak miesendžaraŭ, treba mocna adroźnivacca ad kankurentaŭ.
«Tamu kali b jašče dva hady tamu niechta prapanavaŭ nam raspracavać miesendžar, my b prosta pakrucili palcam la skroni. Ciapier my nabyli hłybinnaje razumieńnie taho, što ŭ hetym kirunku možna zrabić całkam unikalnaje», — kaža Jaŭhien. I, uśmichajučysia, dadaje: «Nu, i niekamu ž ideja zaŭsiody prychodzić pieršaj!»
Da hetaha času kamanda pracavała ŭ režymie butstrepinhu, isnujučy na ŭłasnyja źbieražeńni i dobraachvotnuju dapamohu siabroŭ.
«Ciapier my hatovyja razhladać inviestycyjnyja prapanovy, bo bačym u našym pradukcie patencyjał i ŭpeŭnienyja ŭ jaho zapatrabavanaści i karysnaści», — upeŭnienyja ŭ Scop.
Reliz iOS-prahramy ŭ App Store zapłanavany na studzień.
