Staršynia naziralnaj rady CHK «Dynama-Minsk», ministr unutranych spraŭ Ihar Šunievič žorstka krytykavaŭ rabotu kiraŭnictva kłuba.
Siońnia na rabočaj naradzie hałoŭnamu trenieru kamandy Krejhu Vudkraftu i namieśniku hiendyrektara Paŭłu Burbu byli pastaŭlenyja žorstkija ŭmovy: kali kamanda nie pačnie pakazvać hulniu i zarablać punkty, budzie razhladacca pytańnie pra źmienu kiraŭnictva kłuba.
«Kłub nie maje prava dazvolić sabie zastacca pa-za płej-of dva hady zapar, — adznačyŭ Ihar Šunievič. [Siońnia kłub zajmaje 6-y radok u Zachodniaj kanfierencyi, ale CHK «Sočy», što idzie 9-m, pa-za zonaj płej-of, adstaje ŭsiaho na 1 bał — NN]
— Kali tak adbudziecca, heta budzie aznačać, što ni kiraŭnictva, ni kamanda nie ŭ stanie damahacca vynikaŭ, a značyć i isnavać u takim vyhladzie, jak ciapier. Kali my nie prademanstrujem hulniu pa vynikach siezonu, mnie jak kiraŭniku daviadziecca pryniać surjoznyja i niepapularnyja zachady».
Niepapularnaść mier zaklučajecca ŭ źmienie kiraŭnikoŭ, u pryvatnaści, Paŭła Burby, hienieralnaha dyrektara Anatola Kurylca i niekatorych inšych mieniedžaraŭ kłuba, a, mahčyma, i spartsmienaŭ.
«Heta nie tolki majo mierkavańnie. Tak miarkujuć i inšyja členy naziralnaha savieta, a taksama zaŭziatary. Kali dla kłuba budzie bolš vynikova pazbavicca ad ciapierašniaha kiraŭnictva i praciahnuć budavać kamandu ź inšymi ludźmi, ja hatovy na heta pajści», - skazaŭ na zakančeńnie Ihar Šunievič.
Siońnia kłub pieražyvaje nie lepšyja časy - 5 klučavych hulcoŭ pa stanie zdaroŭja vypali z hulni, i heta, pa słovach hałoŭnaha treniera Krejha Vudkrafta, «dzirki ŭ topavym źvianie». Kab ich zapoŭnić, treba razhladać pytańni ab nabyćci novych hulcoŭ abo vykarystańni reziervu.
Adnak staršynia naziralnaha savieta paličyŭ za lepšaje nie ŭmiešvacca ŭ taktyku kiraŭnictva, addaŭšy kiraŭnikam ŭsie paŭnamoctvy kiraŭničych rašeńniaŭ, akramia dadatkovych materyjalnych vydatkaŭ. «Mnie viadomyja ŭsie składanaści, ź jakimi sutyknuŭsia kłub, ale ŭ nas niama vybaru, akramia jak vyžyvać u takich realijach», - skazaŭ na zakančeńnie Ihar Šunievič, pakinuŭšy za saboj prava pryniać kančatkovaje rašeńnie pa vynikach siezona, jaki zavieršycca praz paru miesiacaŭ.
