Prykładna 60% terytoryi horada Alepa, jakuju raniej utrymlivali paŭstancy, za apošnija tydni pierajšło ŭ ruki siłaŭ Bašara Asada.
Pra heta paviedamlaje Siryjskaja absiervatoryja pravoŭ čałavieka, što bazujecca ŭ Łondanie.
U błakadzie i šturmie Alepa brali ŭdzieł vojski Asada i livanskaha ruchu «Chiezbałach» pry padtrymcy rasijskich avijacyi i daradcaŭ.
Bai ŭ Alepa doŭžacca ad 2012 hoda i pryviali da hibieli, pa roznych acenkach, ad 5000 da 30000 čałaviek.
Rasija ŭmiašałasia ŭ hramadzianskuju vajnu ŭ Siryi na baku dyktatara z ałavickaj dynastyi Asadaŭ.
Suprać Asada vajujuć jak radykalnyja isłamisty, padzielenyja na dziasiatak ideałahičnych i rehijanalnych hrupovak, tak i ŭmieranaja Svabodnaja armija Siryi (SAS).
Isłamistaŭ finansujuć Katar i Saudaŭskaja Aravija.
SAS abapirajecca na dapamohu Turcyi, ZŠA i Vialikabrytanii.
Adnačasova suprać Asada dy isłamistaŭ vystupajuć taksama atrady kurdaŭ, druzaŭ, turkmienaŭ, što adstojvajuć svaje etničnyja intaresy.
Na baku Asada vajujuć etničnaja armija livanskich šyitaŭ «Chiezbałach» i ekśpiedycyjny korpus Irana.
Asada padtrymlivajuć taksama siryjskija chryścijanie — ich u krainie było kala 10%, ale mienavita jany składajuć značnuju častku ŭciekačoŭ u krainy Jeŭropy i Paŭnočnaj Amieryki. Jany bajacca ŭstanaŭleńnia ŭ krainie isłamisckaha režymu ŭ vypadku padzieńnia Asada.
Najbolšaj pahrozaj ličycca tak zvanaja «Isłamskaja dziaržava Iraka i Levanta», baraćboj ź jakoj apraŭdvajuć svajo ŭmiašańnie i Rasija, i ZŠA. U apošnija miesiacy Isłamskaj dziaržavie nanieśli niekalki značnych paražeńniaŭ SAS i kurdskija apałčency.
Vajna ŭ Siryi pryviała da tysiač achviaraŭ. Bambiožkami i artabstrełami razburany sotni nasielenych punktaŭ.
Paŭstancy-sunity sprabavali zachapić Alepa, adnak jaho zachodniaja pałova zastałasia pad uładaj siłaŭ, viernych uradu Bašara Asada. Paśla dałučeńnia da vajny Rasii horad pieražyŭ źniščalnyja bambiožki. Alepa paraŭnoŭvajuć z Hroznym i Varšavaj časoŭ Varšaŭskaha paŭstańnia.
Novaabrany prezident ZŠA Donald Tramp vystupaŭ za spynieńnie amierykanskaj dapamohi paŭstancam Siryi. Razam z šeraham inšych čyńnikaŭ, heta vyklikała zachapleńnie Maskvy, jakaja spadziajecca za ŭmacavańnie svajho ŭpłyvu ŭ krainach byłoha SSSR i na Bližnim Uschodzie.
