Dva hady z hodam adterminoŭki, a taksama 690 rubloŭ štrafu, padpiska ab niavyjeździe dy kanfiskacyja telefona. Takoje rašeńnie vynies sud Kastryčnickaha rajona Hrodna 12 studzienia pa spravie Dyjany Sielivanavaj. Jaje asudzili za raźmiaščeńnie ŭ sacyjalnaj sietcy Vkontaktie karcinki z elemientami parnahrafii.
Taksama pa rašeńni suda dziaŭčyna pavinna budzie pa pieršym ža patrabavańni źjaŭlacca ŭ RAUS.
Dzicia letam nie pajedzie na mora
Prysudam Dyjana šakavanaja, ale abskardžvać jaho nie bačyć sensu.
«Viadoma, termin ja mienšy čakała, ale ździŭlenaja vielmi štrafam. Dla mianie heta vialikaja suma, ja nie viedaju dzie budu brać takija hrošy. Bo mienavita z-za hetaj situacyi ja zastałasia biez pracy — mianie skaracili. A hetyja 690 rubloŭ treba vypłacić za paŭhoda. Što tyčycca vyjezdu za miažu, to mahu skazać tak — majo dzicia letam nie pajedzie na mora».
Dyjana praz žurnalistaŭ źviarnułasia da ludziej i zaklikała ich być bolš uvažlivymi ŭ internecie. «Vydalajcie, čyścicie albomy i nie davajcie hetym ludziam zarabić na vašych zachavanych malunkach. A taksama budźcie ŭvažlivyja i viedajcie što za vami mohuć sačyć. Bo ŭ maim vypadku heta byŭ nie zvyčajny manitorynh, a heta ja kamuści nie dahadziła».
Spravu hrodzienki zaŭvažyli navat u Rasii
Sprava Dyjany atrymała hramadski rezanans nie tolki ŭ Biełarusi, ale i Rasii. Jak paviedamlaje dziaŭčyna, kala tryccaci roznych vydańniaŭ sačyli za jaje spravaj. Dyjana dumaje, što mienavita jaje sprava ŭ budučyni zmoža pasłužyć tamu, kab biełaruskija ŭłady pierahladzieli artykuł za zachoŭvańnie i raspaŭsiudžvańnie parnahrafii ŭ internecie. Dyjana ličyć, što ludzi nie pavinny pakutavać z-za niejkaj adnoj karcinki.
