Alaksandr Łukašenka i prezident, staršynia praŭleńnia PAA «Śbierbank» Hierman Href abmierkavali na sustrečy ŭ Minsku dalejšaje raźvićcio supracoŭnictva ŭ bankaŭskim siektary.
«Našy bankaŭskija spravy — tyja pytańni, pra jakija mianie padrabiazna infarmavaŭ Vasil Maciušeŭski (pieršy vice-premjer Biełarusi), da hetaha my abmiarkoŭvali va ŭradzie — tam razumieńnie znojdziena», - skazaŭ kiraŭnik dziaržavy.
«Ale ja chaču skazać hałoŭnaje: kali Hierman Askaravič budzie stavicca, pracujučy ŭ Biełarusi, da našych partnioraŭ, klijentaŭ, jakija z bankam supracoŭničajuć, tak, jak u Rasii da rasijskich, u nas nikoli nie budzie pytańniaŭ», — padkreśliŭ Alaksandr Łukašenka. Pavodle słoŭ Prezidenta, jon dobra daśviedčany ab pazicyi Hiermana Hrefa na rasijskim pole dziejnaści i čuŭ u hetym płanie šmat dobraha.
U svaju čarhu Hierman Href padziakavaŭ asabista kiraŭniku krainy, a taksama ŭradu, Nacyjanalnamu banku Biełarusi za toje, što ŭ składanych situacyjach, jakija ŭźnikali ŭ 2015 i 2016 hadach, była znojdziena kanstruktyŭnaja padtrymka i vychady. «Hety hod taksama budzie nie vielmi prosty, ale ŭžo značna lepš, čym 2016-y. A z 2018 hoda my raźličvajem ŭžo pačać narmalnuju pracu tut. Vidavočnaje ažyŭleńnie i kredytavańnia, i našaha partfiela aktyvaŭ», - skazaŭ jon.
Hierman Href taksama padkreśliŭ, što ŭsie ŭmovy, pastaŭlenyja raniej pry kupli biełaruskaha banka (AAT «BPS-Śbierbank» uvachodzić u Hrupu Śbierbank), vykanany. «My minimum u paŭtara raza pieravykanali kožny ź piaci punktaŭ našych abaviazacielstvaŭ. Siońnia Śbierbank — najbujniejšy inviestar u biełaruskuju ekanomiku. Heta ŭ tym liku vynik našaha vielmi dobraha ŭzajemadziejańnia i davieru vam asabista i respublicy», - dadaŭ staršynia praŭleńnia Śbierbanka.
