Fota Siarhieja Hudzilina
Viadomy biełaruski handbalist Siarhiej Rutenka pryniaŭ rašeńnie zaviaršyć prafiesijnuju karjeru. Pra heta 35-hadovy eks-hulec «Barsiełony» abviaściŭ na śpiecyjalnaj pres-kanfierencyi, paviedamlaje Priessboł.
Siarhiej pačynaŭ karjeru ŭ minskim «Arkatronie». U składzie junijorskaj zbornaj Biełarusi jon zavajavaŭ srebra maładziožnaha čempijanatu Jeŭropy-2000, a zatym pierabraŭsia ŭ Słavieniju, dzie abaraniaŭ kolery «Hareńnie» i «Cele».
U 2004 hodzie Rutenka upieršyniu vyjhraŭ Lihu čempijonaŭ (usiaho ŭ karjery biełarusa šeść pieramoh u samym prestyžnym jeŭrakubku). Tady ž handbalist pryniaŭ słavienskaje hramadzianstva i debiutavaŭ u składzie bałkanskaj zbornaj na Hulniach u Afinach.
U 2005 hodzie pačaŭsia ispanski etap karjery Rutenki: paŭsiaredni pierabraŭsia ŭ «Śjudad-Real», ź jakim trojčy vyjhraŭ Lihu čempijonaŭ. A praz čatyry hady biełarus staŭ samym darahim handbalistam śvietu — suma jaho tranśfieru ŭ «Barsiełonu» skłała rekordnyja 1,2 miljona jeŭra.
U 2008 hodzie Rutenka pryniaŭ ispanskaje hramadzianstva, u toj ža čas majstar vykazaŭ žadańnie viarnucca ŭ rodnuju zbornuju Biełarusi. U vieraśni 2010 hoda Siarhiej atrymaŭ prava vystupać za našu nacyjanalnuju kamandu, a ŭ 2011 jon staŭ kapitanam zbornaj Biełarusi.
U 2015 hodzie Rutenka pakinuŭ «Barsiełonu». Paśla niadoŭhaj pabyŭku ŭ katarskaj «Lechvii», u krasaviku 2016 hoda Siarhiej dałučyŭsia da minskaha SKA, pryniaŭšy ŭdzieł u finalnaj sieryi čempijanatu Biełarusi. U vieraśni minułaha hoda Rutenka byŭ udastojeny zvańnia «Zasłužany majstar sportu Respubliki Biełaruś».
Siarhiej Rutenka dvojčy stanaviŭsia najlepšym bambardziram Lihi čempijonaŭ (2004, 2005), a ŭ 2013 biełarus byŭ pryznany najlepšym levym paŭsiarednim śvietu.
