AP
Były supracoŭnik brytanskaj raźviedki Krystafier Stył, jakoha ličać aŭtaram apublikavanaha niadaŭna dakumienta ab kampramacie ŭ Rasii na abranaha prezidenta ZŠA Donalda Trampa, zaloh na dno.
Pa dadzienych Bi-bi-si, Stył źjechaŭ sa svajho doma ŭ aŭtorak ci ŭ sieradu, jašče da taho, jak jaho imia źjaviłasia ŭ presie. Pierad adjezdam jon paprasiŭ susiedziaŭ pahladzieć za jaho koškami.
Karespandent Bi-bi-si Poł Vud śćviardžaje, što Stył bajaŭsia za svajo žyćcio jašče ŭ kastryčniku minułaha hoda. Tady ž Vud upieršyniu ŭbačyŭ dakumient, jaki prypisvajuć Styłu, i zaŭvažyŭ u im istotnyja niedakładnaści.
Dakumient byŭ apublikavany ŭ sieradu na sajcie BuzzFeed i adrazu vyklikaŭ šyroki rezanans. U im źmiaščajucca biazdokaznyja śćviardžeńni, što ŭ Rasii jość kampramat na abranaha prezidenta ZŠA Donalda Trampa.
Sajt papiaredžvaŭ čytačoŭ, što paćvierdzić abo abvierhnuć infarmacyju ŭ dakumiencie nie ŭdałosia, i što dakład źmiaščaje šmatlikija pamyłki. Tym nie mienš jon chutka razyšoŭsia pa inšych ŚMI.
Vykładzienyja ŭ dakumiencie źviestki nazvali chłuśnioj i Tramp, i pres-sakratar Kramla Dźmitryj Piaskoŭ. Akramia taho, u jaho sapraŭdnaści ŭsumnilisia pradstaŭniki sajta WikiLeaks, jaki, zrešty, paprakajuć u simpatyjach da Trampa, a taksama byłyja raźviedčyki.
Kiraŭnik Nacyjanalnaj raźviedki ZŠA Džejms Kłepier adznačyŭ, što amierykanskija śpiecsłužby nie majuć dačynieńnia da padrychtoŭki dakłada, dadaŭšy, što viedaŭ pra jaho isnavańnie, ale nie ŭpeŭnieny ŭ praŭdzivaści vykładzienaj tam infarmacyi.
U svajoj publikacyi BuzzFeed zhadvaŭ, što aŭtaram dakumienta ličać byłoha supracoŭnika brytanskaj raźviedki, ale jaho imieni nie pryvodziŭ. Bi-bi-si zdoleła vyśvietlić, što chutčej za ŭsio havorka idzie pra Krystafiera Styła.
Pa dadzienych Bi-bi-si, Stył pieradaŭ dakumient niezaležnaj arhanizacyi, jakaja sprabavała pieraškodzić abrańniu Trampa. Ciapier Stył źjaŭlajecca dyrektaram Orbis Business Intelligence, jakaja nazyvaje siabie viadučaj kampanijaj u halinie karparatyŭnaj raźviedki. Stył nie adkazaŭ na prośbu ab kamientary.
