Biełaruś nie vyklučaje mahčymaść prodažu kvot na vykid parnikovych hazaŭ, paviedamiła 12 studzienia žurnalistam u Minsku pieršy namieśnik ministra pryrodnych resursaŭ i achovy navakolnaha asiarodździa Ija Małkina.
«Budziem my handlavać kvotami? Hetaje pytańnie lažyć nie zusim u toj płoskaści raźvićcia nizkavuhlarodnaha rynku ŭ miežach Paryžskaha pahadnieńnia pa klimacie. Im praduhledžvajecca źnižeńnie vykidaŭ parnikovych hazaŭ», — adznačyła Małkina na pres-kanfierencyi, jakaja prajšła ŭ pres-centry ahienctva BiełTA.
Jana rastłumačyła, što handal kvotami byŭ vyznačany raniej pryniatym dakumientam — Kijockim pratakołam. «Pamiž Paryžskim i Kijockim dahavorami jość pryncypovaje adroźnieńnie. Paryžskaje pramych norm i pasyłaŭ dla handlu nie ŭtrymlivaje. Šerah dakumientaŭ u raźvićcio Paryžskaha pahadnieńnia, jakija praduhledžvajuć arhanizacyjnyja momanty i abaviazacielstvy bakoŭ, pakul znachodziacca ŭ pracy», — paviedamiła pieršy namieśnik ministra.
Na jaje dumku, pryncyp handlu kvotami budzie minimizavany pamiž roznymi dziaržavami i pradpryjemstvami, što było raźvita ŭ krainach, jakija paśpiachova realizavali Kijocki pratakoł.
«Ale heta nie značyć, što kali takija miechanizmy buduć mahčymyja da realizacyi, to ŭ Biełarusi nie budzie šancaŭ paŭdzielničać u hetym pracesie. I siońnia padrychtoŭčaja praca viadziecca. My raspracoŭvajem nacyjanalny płan pa realizacyi ŭziatych Biełaruśsiu abaviazacielstvaŭ pa Paryžskim pahadnieńni, prapracoŭvajem doŭhaterminovyja pierśpiektyvy pa pavyšeńni ambicyjnaści svaich płanaŭ. Pakul abaviazacielstvy, jakija abviaściła Biełaruś, stasujucca z tym, što my siońnia majem», — adznačyła Małkina.
Jana spadziajecca, što z dapamohaj u tym liku miechanizmaŭ, zakładzienych u prahramie dziejańniaŭ pa raźvićci zialonaj ekanomiki Biełarusi, buduć stymulavacca nacyjanalnyja vytvorcy da vybaru zialonych technałohij. «Heta daść mahčymaść pavysić ambicyjnaść abaviazacielstvaŭ, uziatych u miežach Paryžskaha pahadnieńnia», — ličyć čynoŭnik.
Paryžskaje pahadnieńnie — pahadnieńnie ŭ miežach Ramačnaj kanviencyi AAN ab źmienie klimatu (1992), jakoje rehuluje miery pa źnižeńni vuhlakisłaha hazu ŭ atmaśfiery z 2020 hoda. Pahadnieńnie było padrychtavanaje na zamienu Kijockamu pratakołu padčas kanfierencyi pa klimacie ŭ Paryžy i pryniataje kansiensusam 12 śniežnia 2015 hoda, a padpisanaje — 22 krasavika 2016 hoda.
Kijocki pratakoł — mižnarodnaje pahadnieńnie, dadatkovy dakumient da Ramačnaj kanviencyi AAN ab źmienie klimatu, pryniaty ŭ Kijota (Japonija) u śniežni 1997 hoda. Pratakoł abaviazvaje raźvityja krainy i krainy ź pierachodnaj ekanomikaj skaracić abo stabilizavać vykidy parnikovych hazaŭ i praduhledžvaŭ handal kvotami.
