Dazvoł na adłoŭ u zakaźniku «Nalibocki» dvuch rysiaŭ dla vajskovaj čaści 3214 unutranych vojskaŭ MUS nie vydavaŭsia, paviedamili śpiecyjalisty.
Resurs navinaŭ Sputnik 11 studzienia paviedamiŭ, što ministr lasnoj haspadarki Biełarusi Michaił Amieljanovič «daŭ dabro» na adłoŭ ŭ Nalibockaj puščy dvuch asobin rysi, jakija zatym buduć žyć u valjery vajskovaj čaści. Raniej u čaści ŭžo žyli dźvie rysi, padoranyja ŭ 2000 i 2001 hadach rasijskimi kalehami, adnak ŭ 2016 hodzie jany pamierli ad spynieńnia serca. Kiraŭnictva čaści źviartałasia ŭ Biełaviežskuju i Nalibockuju puščy, da ministra lasnoj haspadarki i prasiła dazvolić adłoŭ dla ich dvuch novych asobin.
U pres-słužbie Minlashasa BiełaPAN paviedamili, što ŭ vieraśni minułaha hoda atrymali zvarot MUS z prośbaj sadziejničać adłovu dvuch rysiaŭ ŭ zakaźniku «Nalibocki», adnak vydača dazvołaŭ na adłoŭ žyvioł, zaniesienych u Čyrvonuju knihu, da jakich adnosicca ryś, nie ŭvachodzić u kampietencyju ministerstva. Viedamstva pierasłała zvarot niepasredna ŭ zakaźnik z prapanovaj razhledzieć mahčymaść adabrańnia žyvioł dla hetych metaŭ u adpaviednaści z zakanadaŭstvam, prykłaŭšy pieralik narmatyŭnych aktaŭ, jakimi rehulujecca hetaja pracedura. Paśla hetaha pytańnie bolš nie abmiarkoŭvałasia, u tym liku i ź ministram, adznačyli ŭ pres-słužbie.
Dazvoł na adłoŭ čyrvanaknižnych žyvioł u Biełarusi moža vydać tolki Ministerstva pryrodnych resursaŭ i achovy navakolnaha asiarodździa, adnak u hetaje viedamstva nie pastupała zajaŭ na adłoŭ rysiaŭ u Nalibockaj puščy, paviedamiła BiełaPAN kansultant upraŭleńnia bijałahičnaj i łandšaftnaj raznastajnaści Minpryrody Taćciana Žalaznova.
Pavodle jaje słoŭ, dla atrymańnia takoha dazvołu nieabchodna padać zajavu, abhruntavańnie nieabchodnaści adabrańnia žyvioł z asiarodździa pražyvańnia i bijałahičnaje abhruntavańnie ich pierasialeńnia na inšuju terytoryju, kali heta praduhledžana. Abhruntavańniami dla adłovu žyviolin mohuć być navukovyja mety, pierasialeńnie i raśsialeńnie, skryžavańnie, utrymańnie abo raspłodžvańnie ŭ niavoli, u tym liku za miežami Biełarusi. Śpiecyjalist adznačyła, što dazvoł na ŭtrymańnie abo raspłodžvańnie žyviolin u niavoli vydajecca vielmi redka i ŭ metach zachavańnia hienafondu abo ŭznaŭleńnia žyvioł.
Atrymać dazvoł na adabrańnie žyvioł, zaniesienych u Čyrvonuju knihu, pavodle słoŭ śpiecyjalista, vielmi składana. «Z majoj praktyki, adbirajecca ŭ asnoŭnym zubr dla stvareńnia novych mikrapapulacyj. Za čas majoj pracy pryvatnym abo jurydyčnym asobam, jakija nie zajmajucca pryrodaachoŭnymi pytańniami, my nie vydavali dazvoły na adabrańnie «čyrvanaknižnikaŭ» z asiarodździa pražyvańnia», — dadała Žalaznova.
Zhodna sa źviestkami na 1 maja 2016 hoda ŭ Biełarusi była ŭličanaja 421 asobina rysi. Pavodle słoŭ hałoŭnaha navukovaha supracoŭnika NPC pa bijaresursach Nacyjanalnaj akademii navuk, daśledčyka vaŭkoŭ i rysiaŭ Vadzima Sidaroviča, adłoŭ žyŭcom adnoj rysi budzie kaštavać žyćcia niekalkim inšym, bo navat pry vykarystańni aščadnych mietadaŭ adłovu žyvioliny časta traŭmujucca i hinuć.
Vučony ličyć niedapuščalnym adłoŭ rysiaŭ dla vajskovaj čaści, bo hetaja žyvioła ŭniesienaja ŭ Čyrvonuju knihu i padlahaje achovie. Tym bolš niedapuščalny ich adłoŭ ŭ Nalibockaj puščy, tamu što bolšaja jaje častka ŭvachodzić u zakaźnik «Nalibocki» i źjaŭlajecca asabliva padachoŭnaj pryrodnaj terytoryjaj.
Akramia taho, pavodle słoŭ Sidaroviča, złoŭlenyja rysi ŭ niavoli žyvuć značna mienš, čym u dzikaj pryrodzie, a žyvioliny, jakija naradzilisia ŭ niavoli, pry dobrym utrymańni mohuć pražyć i bolš, čym na voli. Na dumku navukoŭca, dla ŭtrymańnia ŭ niavoli lepš nabyć žyvioł u zaaparku, dzie jany naradzilisia.
