3 lutaha ŭ sudzie Pieršamajskaha rajona buduć razhladać tak zvanuju «spravu antyfašystaŭ». Spynienuju spravu ab bojcy pamiž fanatami adnavili i zapuścili znoŭ praz hod paśla incydentu.

Sutyčka pamiž prychilnikami dvuch minskich futbolnych kłubaŭ — «ultrapravymi» fanatami «Tarpieda» i «antyfašystami», što zaŭziejuć za «Partyzan» — adbyłasia jašče 29 červienia 2014 hoda. Tady dźvie hrupy fanataŭ pabilisia na prypynku na vulicy Nieścierava. Paśla, jak paviedamlała milicyja, niedaloka ad handlovaha centra «Maksimus» maładyja ludzi na niekalkich mašynach błakavali ruch tralejbusa №3.

«Raźbiŭšy ŭ im škło i paškodziŭšy korpus, chulihany raspylili ślezaciečny haz, paśla čaho źbiehli. Pryčynaj vandalizma stała razborka z fanatami inšaha staličnaha kłuba «Tarpieda», jakija znachodzilisia ŭ sałonie razam ź inšymi pasažyrami», — paviedamlała pres-słužba MUS.

10 lipienia 2014 hoda ŭ dačynieńni da 10 čałaviek byli zaviedzienyja kryminalnyja spravy za chulihanstva. Škoda tralejbusnamu parku skłała 280 tysiač «starymi», paciarpiełych siarod pasažyraŭ nie było. Nieŭzabavie ŭsich zatrymanych vypuścili, spravu prypynili.

Ale ž paźniej raźbiralnictva adnavili. U sakaviku 2016 prajšoŭ šerah vobšukaŭ u kvaterach niekalkich dziasiatkaŭ minskich antyfašystaŭ.

Vynikam stali aryšty 2 čałaviek — za kraty trapili trenier pa tajskim boksie Illa Vałavik i jaho siabar Vadzim Bojka. 4 sakavika i 1 žniŭnia byli aryštavanyja jašče dvoje antyfašystaŭ, Dźmitryj Ciechanovič i Filip Ivanoŭ, ich źmiaścili ŭ SIZA.

Siabry Ciechanoviča raskazvali, što 4 krasavika jamu patelefanavali z Hałoŭnaha ŭpraŭleńnia baraćby z arhanizavanaj złačynnaściu i karupcyjaj (HUBAZiK). Pravaachoŭniki prapanavali jamu zabrać skanfiskavanyja padčas vobšuku rečy. Dadomu chłopiec nie viarnuŭsia.

Usim čaćviarym Śledčy kamitet pradjaviŭ abvinavačvańni ŭ asabliva złosnym chulihanstvie (maksimalnaje pakarańnie pa hetym artykule — pazbaŭleńnie voli terminam da 10 hadoŭ). Praz 4 miesiacy źniavoleńnia ŭ siaredzinie žniŭnia pad padpisku ab niavyjeździe byŭ vypuščany Dźmitryj Ciechanovič, a krychu paźniej vyzvalili i Filipa Ivanova. Adnak abvinavačvańni ź ich źniaty nie byli.

Takim čynam, sudzić buduć šaściarych. Heta zatrymanyja ŭ sakaviku Vałavik, Bojka, Ciechanovič, Ivanoŭ i zatrymanyja raniej Kraŭčanka i Čartovič. Ich usich abvinavačvajuć u asabliva złosnym chulihanstvie. Akramia taho, Vałavika vinavaciać u kiraŭnictvie niezarehistravanaj arhanizacyjaj — a heta moža paciahnuć pazbaŭleńnie voli na termin da 3 hadoŭ. Kraŭčanku z Čartovičam abvinavačvajuć u zachoŭvańni narkotykaŭ.

Na voli z šaści čałaviek znachodziacca tolki dvoje — Filip Ivanoŭ i Dźmitry Ciechanovič.

Zatrymanyja skardziacca na ŭmovy ŭtrymańnia. Usich čaćviarych vyklikali na «prafiłaktyčnuju» hutarku da načalstva izalatara, dzie im paviedamili, što jany znachodziacca na ŭliku jak ekstremisty. I litaralna na praciahu nastupnych niekalkich dzion jany atrymali adzin za adnym papiaredžańni. Ciapier u vypadku čarhovaha papiaredžańnia kožny z pakinutych pad aryštam adpravicca ŭ štrafny izalatar. Vadzim Bojka skardzicca, što ŭ śledčym izalatary jamu ŭžo amal hod nie akazvajuć nieabchodnuju miedycynskuju dapamohu — jon ad naradžeńnia znachodzicca na ŭliku z dyjahnazam hiemanhijoma (dabrajakasnaja puchlina).

Što stała pryčynaj raptoŭnaj cikavaści da staroj i zakrytaj, zdavałasia b, spravy, nieviadoma. Ale pa nieaficyjnaj infarmacyi, sprava adnaviłasia mienavita paśla zatrymańnia Kraŭčanki i Čartoviča, jakich vinavaciać u zachoŭvańni narkotykaŭ. Čartovič byŭ zatrymany ŭvosień 2015 hoda, Kraŭčanka — na pačatku 2016 hoda. Mienavita paśla pracy ź imi pravaachoŭniki iznoŭ viarnulisia da «spravy antyfašystaŭ».

Taksama, pa niepaćvierdžanaj infarmacyi, praz praciahły čas paśla toj bojki byŭ zatrymany i asudžany za raspaŭsiud narkotykaŭ adzin z fanataŭ minskaha «Tarpieda». Ciapier pa spravie ab bojcy ŭ 2014 hodzie jon budzie prachodzić paciarpiełym. Pryčym, paciarpiełym jon «vyrašyŭ» stać užo paśla pasadki ŭ kałoniju — u 2014 anijakich paciarpiełych pa spravie nie było.

Pradstaŭniki antyfašysckaj supołki ŭpeŭnienyja — sprava maje palityčny ŭchił.

«Napadu i bojki ŭ materyjałach kryminalnaj spravy pieršapačatkova nie było — heta chłuśnia MUS i Śledčaha kamiteta. Takaja ž, jak i «błakavańnie tralejbusa mašynami». Dadzienaja zahadzia iłžyvaja infarmacyja nakiravana na stvareńnie niehatyŭnaha emacyjnaha fonu z boku hramadskaści vakoł «spravy antyfašystaŭ». Abvinavačanyja pa «spravie antyfašystaŭ», na dumku HUBAZiK, źjaŭlajucca aŭtarytetami siarod roznych hrup antyfašysckaha ruchu Minska i ŭjaŭlajuć pahrozu dziejučaj ułady. Staviačy pierad saboj zadaču likvidavać usie niepadkantrolnyja siłavym strukturam moładzievyja abjadnańnia ŭ Biełarusi, HUBAZiK takim čynam sprabuje dasiahnuć svajoj mety», — zajaŭlajuć pradstaŭniki «antyfa».

Jany ličać, što ich karajuć za aktyŭnaść: antyfašysty pastajanna pravodziać roznyja akcyi, čaściakom udzielničajuć u apazicyjnych šeściach i mitynhach.

Ale ž pravaabaroncy palityki ŭ spravie nie bačać. Illu Vałavika i Vadzima Bojku palitźniavolenymi tak i nie pryznali.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?