Biełaruś i Jeŭrasajuz pa-roznamu kamientujuć chod pieramovaŭ pa pahadnieńniach ab spraščeńni vizavaha režymu i readmisii. Heta vynikaje z kamientaryja pradstaŭnictva ES na zajavu načalnika hałoŭnaha konsulskaha ŭpraŭleńnia Ministerstva zamiežnych spraŭ Biełarusi Ihara Fisienki.

10 studzienia Fisienka zajaviŭ, što na hety momant Biełaruś nie zdolnaja vykanać pahadnieńnie ab readmisii ŭ razumieńni Jeŭrasajuza. Pavodle jaho słoŭ, Jeŭrasajuz žorstka abumoŭlivaje praces pierahavoraŭ ab spraščeńni vizavych pracedur zaklučeńniem pahadnieńnia ab readmisii. «Heta značyć, adno pahadnieńnie bieź inšaha prosta nie nabudzie moc. Sa spraščeńniem vizavych pracedur nijakich pryncypovych prablem niama, ale hetaje pahadnieńnie źviazanaje całkam z pahadnieńniem ab readmisii», — skazaŭ pradstaŭnik MZS.

U listapadzie minułaha hoda Alena Kupčyna, jakaja na toj momant zajmała pasadu namieśnika ministra zamiežnych spraŭ, tłumačyła žurnalistam: Biełaruś choča atrymać trochhadovy pierachodny pieryjad dla implemientacyi pałažeńniaŭ pahadnieńnia ab readmisii. Taki termin padavaŭsia inšym krainam, ź jakimi ES zaklučaŭ takija pahadnieńni, u tym liku z Rasijaj, Ukrainaj i Turcyjaj, padkreśliła jana. «Hałoŭnaje dla nas ciapier — heta vyrašyć pytańnie ab readmisii. Sprava nie ŭ našaj niehatovaści pryniać hetyja abaviazacielstvy. My hatovyja, ale chočam vykonvać ich hodna», — zajaŭlała Kupčyna. Pavodle jaje słoŭ, staić taksama techničnaje pytańnie pra biełaruskija dypłamatyčnyja pašparty (Jeŭrasajuz choča atrymać dadatkovyja harantyi pa biaśpiecy takich pašpartoŭ), ale jano nie źjaŭlajecca klučavym.

U pradstaŭnictvie Jeŭrasajuza ŭ Biełarusi, kamientujučy pa prośbie BiełaPAN zajavu Ihara Fisienki, paviedamili, što pieramovy pa pahadnieńni ab readmisii pamiž ES i Biełaruśsiu ŭ asnoŭnym zaviaršylisia ŭ sakaviku 2015 hoda.

«Ale farmalnaje zaklučeńnie pahadnieńnia zaležyć ad rašeńnia pytańniaŭ, źviazanych z pahadnieńniem ab spraščeńni vizavaha režymu. Jeŭrasajuzu nieviadoma pra niejkija adroźnieńni ŭ interpretacyi pałažeńniaŭ pahadnieńnia. U toj ža čas čakajecca, što ekśpierty abodvuch bakoŭ sustrenucca najbližejšym časam, kab razabracca ź lubymi pytańniami, jakija mohuć zastavacca niavyśvietlenymi», — adznačyli tam.

U pradstaŭnictvie taksama padkreślili: hałoŭnym pry praviadzieńni pieramovaŭ byŭ i zastajecca toj pryncyp, što abodva pahadnieńni (ab spraščeńni vizavaha režymu i ab readmisii) pavinny nabyć moc i prymianiacca adnačasova.

Najbližejšym časam, paviedamili ŭ pradstaŭnictvie, pavinna pačacca realizacyja prajekta ŭ ramkach prahramy «Partniorstva ŭ śfiery mabilnaści». Prajekt budzie ažyćciaŭlacca za srodki ES u abjomie 7 młn jeŭra, jon nakiravany na toje, kab «dapamahčy Biełarusi ŭ baraćbie ź nierehularnaj mihracyjaj i, akramia ŭsiaho inšaha, padtrymać jaje ŭ realizacyi pahadnieńnia ab readmisii». Važnym kampanientam pry realizacyi prajekta źjaŭlajecca davańnie Biełarusi dapamohi ŭ stvareńni niekalkich novych centraŭ raźmiaščeńnia mihrantaŭ u ramkach «Partniorstva ŭ śfiery mabilnaści».

U miežach prajekta taksama płanujecca źviarnucca da prahramna-narmatyŭnych i zakanadaŭčym pytańniaŭ, źviazanych z kiravańniem mihracyjaj, u tym liku da raspracoŭki stratehii kiravańnia mihracyjaj i stvareńnia sistemy akazańnia dapamohi mihrantam u dobraachvotnym viartańni i reintehracyi, paviedamili ŭ pradstaŭnictvie ES.

Na praciahu apošnich dvuch dziesiacihodździaŭ, adznačyli tam, ES sistemna akazvaje dapamohu adpaviednym viedamstvam Biełarusi ŭ pytańniach rehulavańnia miažy, u tym liku ŭ pytańniach niezakonnaj mihracyi. Naprykład, ES dapamoh pabudavać u Breście centr časovaha raźmiaščeńnia nielehalnych mihrantaŭ, u jakim mohuć pražyvać da 30 čałaviek (u miežach prajekta «BOMBIEŁ-1»).

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?