U pačatku lutaha startuje pieršy mižnarodny kinaprajekt pad łejbłam «Zroblena ŭ Biełarusi», paviedamili 13 studzienia na pres-kanfierencyi ŭ Minsku členy zdymačnaj hrupy. Nad stvareńniem filma pracujuć kiniematahrafisty ź Biełarusi, Italii, Livana, Rasii i Siryi.

Karcinu «Nieviadomy sałdat», jakaja budzie źniataja pa adnajmiennaj knizie italjanskaha piśmieńnika i žurnalista Džyani Piereli, płanujuć pradstavić užo vosieńniu na Vieniecyjanskim kinafiestyvali. Na dumku inicyjataraŭ prajekta, hety film dazvolić biełaruskamu kiniematohrafu zajavić pra siabie ŭ śviecie. Adzin z pradziusaraŭ filma Anžeła Skonda adznačyŭ, što siońnia ŭ śviecie nichto nie viedaje pra biełaruskaje kino.

«Biełaruś nikoli nie ŭdzielničała ŭ takich surjoznych forumach, jak Vieniecyjanski kinafiestyval, i heta — vydatnaja mahčymaść dla prezientacyi krainy ŭ śviecie kino», — skazaŭ jon.

Pradziusar adznačyŭ, što Biełaruś była abranaja ŭ jakaści asnoŭnaj zdymačnaj bazy karciny, tamu što «kiniematahrafičnaja technika i piersanał padychodziać pad jeŭrapiejskija standarty dla vytvorčaści takoha filma».

Kaardynatar kinaprajekta ŭ Biełarusi Alaksandr Leviančuk rastłumačyŭ, što łejbł «Zroblena ŭ Biełarusi» aznačaje, što film budzie zrobleny jurydyčnaj asobaj — kinakampanijaj «Orbat-siniema», — zarehistravanaj u respublicy, usie padatki taksama buduć płacicca tut.

Asnoŭnyja zdymki namiečany na krasavik—maj. Jany projduć u Biełarusi, Siryi i Čačni (Rasija). Na terytoryi Biełarusi buduć zdymacca epizody, źviazanyja ź biełaruskaj i rasijskaj pryrodaj i architekturaj. Niejkija vulicy buduć pakazvać Maskvu, u inšych kadrach buduć pakazany viadomyja miescy Biełarusi, paviedamiŭ Leviančuk.

U zdymkach voźmuć udzieł biełaruskija akciory. Asnoŭny kastynh projdzie ŭ lutym.

Biudžet filma 5,5 młn. jeŭra, jon farmirujecca šeraham krain, siarod jakich Biełaruś, Jehipiet, Livan, Rasija, Siryja, Turcyja. Pavodle słoŭ Leviančuka, biełaruskich dziaržaŭnych hrošaj u filmie niama, ale luboj dapamohi z boku ŭładaŭ kinakampanija budzie rada.

Film płanujuć źniać u vielmi karotkija terminy, i heta mahčyma dziakujučy sučasnamu abstalavańniu, jakoje dazvalaje adnačasova zdymać i tut ža manciravać, padkreśliŭ režysior filma Kłaŭdyjo Małaponci.

Karcina raskazvaje ab baraćbie z teraryzmam na prykładzie historyi adnaho ruskaha čałavieka italjanskaha pachodžańnia, jaki ŭ razhar siryjskaha vajennaha kanfliktu trapiŭ u pałon. Asnoŭny pasył filma, pavodle słoŭ aŭtaraŭ, — baraćba z hvałtam i imknieńnie da miru i lubovi.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?