Biełaruskija honščyki pakazali na rali-rejdzie «Dakar-2017» najlepšy vynik za ŭsiu historyju svaich vystupaŭ. Ekipaž pad kiraŭnictvam Alaksandra Vasileŭskaha skončyŭ marafon na šostym miescy, paviedamili auto.tut.by ŭ kampanii velcom, jakaja vystupiła techničnym partnioram kamandy «MAZ-SPORTaŭta».
Alaksandr Vasileŭski pabiŭ papiaredni rekord mazaŭskaj kamandy. U 2015 hodzie jaho ekipaž zaniaŭ 10-je miesca na «Dakary». Sioleta rali-rejd byŭ składaniejšym, ale i bolš paśpiachovym za papiarednija marafony — biełaruskija honščyki zaniali šostaje miesca, a kab patrapić u piaciorku najmacniejšych im nie chapiła ŭsiaho 8 chvilin.
Čempijonam rali-rejdu «Dakar-2017» staŭ kamazaŭski ekipaž pad kiravańniem Eduarda Mikałajeva. MAZ Alaksandra Vasileŭskaha, zaniaŭšy šosty radok u śpisie «marafoncaŭ», sastupiŭ jamu prykładna 2 hadziny 35 chvilin. Na druhim miescy — rasijanin Dźmitryj Sotnikaŭ, a zamknuŭ trojku hałandziec Žerar de Roj na Iveco.
Ekipaž MAZa pad kiravańniem Siarhieja Viazoviča ŭ ahulnym zaliku zaniaŭ 13-je miesca. MAZ Alaksieja Višnieŭskaha zaviaršyŭ rali-rejd na 21-m miescy.
«Hety «Dakar» staŭ samym składanym i niebiaśpiečnym rali-rejdam za apošnija hady. U im było ŭsio — i rezkija pierapady vyšyń, i vielizarnyja dziuny, i anamalnaja śpiakota, i mocnyja liŭni, jakija miescami pieratvaryli trasu ŭ hrazkaje miesiva. Mazaŭskija ekipažy jašče nikoli nie vystupali na «Dakary» hetak dobra. Pryčym ź lepšaha boku pakazali siabie jak honščyki, tak i technika. Na siońnia MAZ — adzin ź lepšych aŭtamabilaŭ u śviecie. Kankurencyju nam składajuć tolki KAMAZ i Iveco. Možna skazać, što my prabilisia ŭ elitu suśvietnaha aŭtasportu, — adznačyŭ piłot i kiraŭnik kamandy «MAZ-SPORTaŭta» Siarhiej Viazovič.
Minski aŭtazavod ŭdzielničaŭ u marafonie «Dakar» šosty raz. Rali-rejd prajšoŭ pa terytoryjach adrazu troch krain — Arhientyny, Balivii i Parahvaja. Praciahłaść maršrutu skłała kala 9 tys. km. U kłasie hruzavikoŭ u rali brali ŭdzieł 50 ekipažaŭ, a da finišu dajechali 42 mašyny.
