Ministerstva zamiežnych spraŭ płanuje «krok za krokam» pašyrać mahčymaści dla biaźvizavaha ŭjezdu zamiežnikaŭ u Biełaruś, zajaviŭ ministr zamiežnych spraŭ Uładzimir Makiej padčas cyrymonii adkryćcia miemaryjalnaj doški ź infarmacyjaj ab miescy raźmiaščeńnia ŭ 1919 h. Narodnaha kamisaryjata pa zamiežnych spravach.
— My pavinny ruchacca krok za krokam. Ja dumaju, što nievialikimi krokami my vyrašym vizavuju prablemu. My pašyrym biaźvizavy ŭjezd dla zamiežnych hramadzian, jakija chočuć naviedać Biełaruś. Ja ŭpeŭnieny, što my vyrašym i vizavuju prablemu ŭ našych pieramovach ź Jeŭrapiejskim sajuzam, — zajaviŭ ministr zamiežnych spraŭ.
Nahadajem, z 12 lutaha ŭ našu krainu bieź viz na piać dzion zmohuć prylatać hramadzianie 80 dziaržaŭ. U suviazi z hetym u maskoŭskich aeraportach u niekatorych pasažyraŭ, jakija prylacieli ź Biełarusi, pačali praviarać pašparty - kab nie prapuścić biaźvizavych turystaŭ u Rasiju.
— Tam nie praviarajuć usich pasažyraŭ, jakija prybyvajuć ź Minska. Zusim nie, — patłumačyŭ Uładzimir Makiej. - U Rasii praviarajuć taksama pasažyraŭ, jakija prybyvajuć z paŭdniovych kirunkaŭ. Z Sočy, naprykład. Idzie vybaračnaja pravierka ŭ metach biaśpieki. Ale ja viedaju, što peŭnyja prablemy isnujuć. My pracujem razam z našymi rasijskimi kalehami nad vyrašeńniem hetych prablem. I ja dumaju, što my ich vyrašym.
