Udzieł mužčynskaj zbornaj Biełarusi na čempijanacie śvietu pa chakiei ź miačom znachodzicca pad sumnievam.
Prezident fiederacyi Viktar Plac vykazvaje pretenzii ministru sporta Alaksandru Šamko. Toj, zaniaŭšy pasadu ŭ kancy 2012 hoda, admoviŭsia finansavać zbornuju Biełarusi pa chakiei ź miačom.
Jon nibyta paabiacaŭ vydzielić na čempijanat śvietu-2013 pałovu zapytanaj sumy, ale ŭ vyniku nie daŭ ni rubla. Na nastupnyja spabornictvy hrošy taksama šukała fiederacyja. Pakolki čempijanaty śvietu hod za hodam prachodzili ŭ Rasii, kvitkami dapamahała rasijskaja fiederacyja.
Sioleta chakieisty musiać jechać u Šviecyju, i hrošaŭ niama. «Hulcy i treniery nie mohuć sabie dazvolić kuplu avijabiletaŭ da Stakholma i nazad, nie kažučy ŭžo ab finansavańni z ułasnaj kišeni trenirovačnaha zboru ŭ Šviecyi choć by na 4 dni. Ministr, jak zaŭsiody, zaniaŭ pazicyju «maja chata z kraju». Tak što, chutčej za ŭsio, Biełaruś na čempijanacie śvietu pa chakiei ź miačom zaŭziatary Šviecyi, Rasii, Kazachstana, Finlandyi i Narviehii nie ŭbačać», — aburajecca Plac.
Zbornaja Biełarusi zajmała na apošnich čempijanatach śvietu šostaje-siomaje miescy. Asablivaść kankurencyi ŭ chakiei ź miačom ŭ tym, što Biełaruś spačatku źniščaje Łatviju ź likam 18:2, a paśla sama cierpić razhrom ad Finlandyi (3:17).
Čamu biełaruskija padatkapłacielščyki pavinny finansavać hety vid sporta?
«Nu ŭ jakich hulniavych vidach sportu kamandy Biełarusi mahli na praciahu mnohich hadoŭ abyhryvać ZŠA? Chiba što ŭ handbole. Ale kali toje było? Ciapierašniaje pakaleńnie hetaha ŭžo i nie pamiataje», — kaža Viktar Plac. Da taho ž, jon spadziajecca na alimpijskija pierśpiektyvy chakieja ź miačom.
