Alaksandr Łukašenka prakamientavaŭ zatrymańnie biznesoŭca Alaksandra Knyroviča, pieradaje BIEŁTA.
Alaksandr Knyrovič.
Razmaŭlajučy z pradstaŭnikami miascovaj ułady, kiraŭnik dziaržavy źviarnuŭ asablivuju ŭvahu na niedapuščalnaść ździajśnieńnia supraćpraŭnych dziej. U hetaj suviazi jon prakamientavaŭ infarmacyju ab zatrymańni viadomaha biznesoŭca i błohiera, zasnavalnika hrupy kampanij «SarmatTerma-Inžynirynh» Alaksandra Knyroviča.
«Hetaje pytańnie było na kantroli, i ja daručyŭ biez usialakich adterminovak i bojazi raskrucić jaho. Jak akunulisia — tam sotni tysiač dalaraŭ kruciacca. Vyjavili ŭsiu ciomnuju buchhałteryju. Samaje hałoŭnaje, jon ža ciapier płačacca ab pamiłavańni, hatovy kampiensavać škodu, pryznaŭšy svaju vinu. Spahady da žulikaŭ nijakaj nie budzie. Złodziej pavinien siadzieć u turmie — voś takuju rezalucyju ja nakłaŭ na dakład staršyni Kamiteta dziaržbiaśpieki. Usie, chto da hetaha datyčny, buduć siadzieć», — padkreśliŭ Łukašenka.
Kiraŭnik dziaržavy dadaŭ, što taksama nieabchodna vyvučyć pracu kiraŭnikoŭ rajonaŭ, dzie ździajśniajucca takija złačynstvy. «Čamu jany dapuścili? Čamu jany zakuplali pradukcyju pa zavyšanych cenach? — zadaŭ pytańnie jon. — Sutnaść hetaha złačynstva: kuplali dla ŽKH pradukcyju pa zavyšanych cenach, hetuju zavyšanuju canu dzialili pamiž tymi, chto kuplaŭ, chto byŭ pasiarednikam. Paviazali dziasiatki ludziej chabarami. Adkryvali rachunki ŭ Rasii, Litvie, Łatvii. Tudy hnali hrošy, adtul čamadanami vyvozili abo na kartcy i dzialili tut. Cełaja złačynnaja schiema. Jakaja tut moža być łaska da hetych ludziej, jakoje pamiłavańnie?»
Łukašenka źviarnuŭ uvahu kiraŭnikoŭ na niedapuščalnaść ździajśnieńnia supraćpraŭnych dziej. «Vy tvaram da tvaru z narodam. Naš narod samy spraviadlivy. Našy ludzi ŭbačać usio, tamu nie padstaŭlajciesia. Kali vy navat padumali niešta — heta z časam budzie viadoma: takoje u nas hramadstva — z abvostranym pačućciom spraviadlivaści. Tamu ja vas prašu: nie čapajcie čužoje, asabliva dziaržaŭnaje, — padkreśliŭ Łukašenka. — Heta surjoznaje pytańnie. Tut ja nikoli nie adstuplu».
* * *
Pa viersii KDB, z 2014 hoda pradstaŭniki kampanii «SarmatTerma-Inžynirynh» zabiaśpiečvali praviadzieńnie zakaznych biržavych tarhoŭ dla realizacyi darahoj pradukcyi. Šlacham zmovy i podkupu kiraŭnikoŭ i słužbovych asob pradpryjemstvaŭ ŽKH i arhanizacyj enierhietyki złamyśniki arhanizoŭvali cieniavyja tendary. Pry hetym sumy «adkataŭ» zakładvalisia firmaj u sabiekošt pradukcyi, zavyšanaja cana jakoj uličvałasia pry farmavańni kamunalnych taryfaŭ. Heta značyć faktyčna prybytak kamiersantaŭ i chabary słužbovych asob apłačvalisia za košt nasielnictva. Za dva apošnija hady firma «SarmatTerma-Inžynirynh» takim kryminalnym šlacham pastaviła dziaržstrukturam trub na 90 młn rubloŭ.
