Lidar «maładafrontaŭcaŭ» Źmicier Daškievič paviedamiŭ, što zmoh viarnuć svajo kanfiskavanaje aŭto. Hrošy na apłatu štrafaŭ za ŭdzieł u akcyjach hramada sabrała tałakoj.
«Dziakuj Bohu za pieramohu!
«Źmicier, zajdzi na ŭpravu, tut tabie pakinuli hrošy,» — tryhotkim hołasam zaprasiła mianie Valžyna Šutava. «Navošta tak chvalavacca?» — padumaŭ ja idučy na ŭpravu. «Trymaj, tut dźvie tysiačy», — praciahnuła Valžyna kapertu. Ja zazirnuŭ — usio zialonaje — i raschvalavaŭsia sam.
Nieviadomy čałaviek pakinuŭ na ŭpravie Partyi BNF dźvie tysiačy dołaraŭ i pajšoŭ sabie pa spravach. Ja dumaŭ, što ŭ Biełarusi daŭno ŭžo niama takich biznesmienaŭ, jakija hatovy takija hrošy achviaravać zmaharam, ale voś vam, kali łaska…
Pry tym, što ja ni da koha nie źviartaŭsia i nie prasiŭ dapamohi, dziasiatki ludziej za hetyja paru dzion napisali z prapanovaju dapamahčy! Niekalki čałaviek prapanavali brać ichnija mašyny i katacca, kolki spatrebicca. Adzin chryścijanin nastojvaje, kab ja zabraŭ adnu ź dźviuch jahonych mašyn u jakaści padarunka. Skažu vam, siabry, praŭdu — ja nikoli nie sutykaŭsia z takoj padtrymkaj! Dziakuj kožnamu dobramu sercu za padtrymku, malitvy, dapamohu!
Dziakujučy ciopłaj časinie hoda, jakaja, — jak mudra zaŭvažyŭ Siaržuk Siemianiuk, — chutka prychodzić, była spłočana ilvinaja častka štrafaŭ. Jašče častku novych pratakołaŭ i 10% prystavovaha navaru ja spłaciŭ z achviaravanych hrošaŭ i ŭčora poźnim viečaram vyrvaŭ našu mašynku z łapaŭ sudovych darmajedaŭ.
Chaču natchnić usich: stojcie tryvała, pašyrajcie idei Biełaruščyny — i znojducca ludzi, jakija padtrymajuć vas i vašu pracu. I hetych ludziej budzie značna bolš, čym nia tolki našyja vorahi, ale i my sami možam ujavić. Prynamsi, ja nia viedaju nivodnaha čałavieka, jaki za svaje kroŭnyja płaciŭ by štrafy, biez padtrymki zastavaŭsia b ŭ supraćstajańni sa złačyncami. Zaŭsiody budzie padtrymka, zaŭsiody budzie dapamoha — Hospad natchniaje na heta mnohija i mnohija sercy, značna bolej, čym my navat možam sabie ŭjavić )
Na zło našym voraham i na radaść usim ludziam dobraj voli budźma salidarnymi! Kali chto choča paŭdzielničać, vy možacie zaŭsiodna achviaroŭvać na našu ahulnuju z vami spravu ŭ miežach kampanii #nakołyiściahi ».
