U subotu, 28 studzienia, na Marsavym pole ŭ Sankt-Pieciarburhu adbyłasia novaja akcyja pratestu suprać pieradačy Isakijeŭskaha sabora Ruskaj pravasłaŭnaj carkvie. Farmalna heta była sustreča niekalkich deputataŭ z vybarščykami, bo haradskaja administracyja nie dazvoliła im sabrać mitynh.
Papiaredniaja akcyja ŭ Pieciarburhu adbyłasia 13 studzienia. Padrabiazny analiz situacyi čytajcie na nn.by.
Udzielniki pratestnaj akcyi na Marsavym pole aceńvali kolkaść tych, chto pryjšoŭ pa-roznamu — ad troch da siami tysiač čałaviek. Mnohija prychodzili tolki dla taho, kab pastavić svoj podpis pad dvuma pietycyjami: z patrabavańniem admianić pieradaču sabora RPC i z zaklikam da adstaŭki hubiernatara horada Hieorhija Pałtaŭčanki, jaki heta rašeńnie sankcyjanavaŭ.
Niahledziačy na toje, što farmat sustrečy deputataŭ z vybarščykami nie praduhledžvaje najaŭnaści łozunhaŭ i transparantaŭ, niekatoryja pryjšli z samarobnymi płakatami z nadpisami «Isaakijeŭski sabor nie addadzim RPC», «Bohu nie patrebna nieruchomaść», «Kirył, pabojsia Boha».
Akramia taho, mnohija ź mitynhoŭcaŭ prymacavali da adzieńnia błakitnyja stužki — simvał ruchu pa zachavańni horada.
Čyje naščadki vyjšli na abaronu sabora
Deputat haradskoha zakanadaŭčaha schodu, były deputat Dziarždumy Aksana Dźmitryjeva adznačyła, što padpisanaje Pałtaŭčankam rašeńnie supravadžałasia hrubymi parušeńniami rasijskaha zakanadaŭstva. «Muziejny fond nie padlahaje pieradačy nikomu», — padkreśliła palityk.
Aksana Dźmitryjeva na akcyi pratestu
Taksama jana zhadała skandalnaje vykazvańnie vice-śpikiera ciapierašniaha sklikańnia Dziarždumy Piatra Tałstoha pra toje, što suprać pierapadparadkavańnia sabora pratestujuć ŭnuki tych, chto «rušyŭ našy chramy, vyskačyŭšy z-za rysy asiełaści z nahanam u 17-m hodzie». Paźniej Tałstoj vybačyŭsia za svajo vykazvańnie.
«Ja ad siabie mahu śćviardžać, što siońnia Isaakijeŭski sabor adstojvajuć naščadki tych, chto žyŭ, zmahaŭsia, pamiraŭ, vajavaŭ u błakadnym Leninhradzie», — padkreśliła jana ŭ hutarcy z DW.
Na mitynhu taksama było abvieščana ab zasnavańni pastajanna dziejučaha Kamiteta ŭ abaronu Isakijeŭskaha sabora i ab stvareńni ruchu «Pravasłaŭnyja suprać pieradačy Isakija RPC».
Miž tym akcyja prychilnikaŭ pieradačy sabora Carkvie sapraŭdy adbyłasia. Na jaje pryjšli 10—15 aktyvistaŭ prakramloŭskaha «Nacyjanalna-vyzvolnaha ruchu» («Nacionalno-osvoboditielnoho dvižienija»; NOD).
