GETTY IMAGES
Prezident Donald Tramp padpisaŭ ukaz, jaki prypyniaje pryjom Złučanymi Štatami biežancaŭ ź inšych krain. Ukaz, pavodle jaho słoŭ, zaklikany, kab nie dapuścić u krainu «radykalnych musulmanskich terarystaŭ».
U adpaviednaści z ukazam dla hramadzian šerahu musulmanskich krain uvodzicca 90-dzionnaja zabarona na ŭjezd u Złučanyja Štaty.
Zabarona na ŭjezd u ZŠA žycharam siami krain ź pieravažna musulmanskim nasielnictvam zakranie taksama i ŭładalnikaŭ prava na stałaje žycharstva ŭ ZŠA (Hryn-karty).
Takim čynam, hramadzianie Siryi, Jiemiena, Iraka, Irana, Livii, Samali i Sudana, u jakich jość Hryn-karta, vyjechaŭšy za miežy ZŠA, nie zmohuć viarnucca ŭ krainu.
Jak paviedamili Bi-bi-si ŭ Dziarždepartamiencie ZŠA, viedamstva pracuje nad nieadkładnym uviadzieńniem u dziejańnie hetaj zabarony.
Ahienctva Frans-pres paviedamiła, što šerah avijakampanij admaŭlajecca ad pieravozki u ZŠA hramadzian Irana. Tak avijakampanii Etihad Airways, Emirates i Turkish Airlines paprasili turystyčnyja ahienctvy nie pradavać kvitki ŭ ZŠA irancam, a taksama zabaranić pasadku na rejsy, jakija laciać u ZŠA, navat tym hramadzianam Irana, jakija majuć amierykanskuju vizu.
Jak paviedamlajecca, u Ńju-Jorku zatrymanyja dva tranzitnyja pasažyry — biežancy ź Iraka. Adzin ź ich pracavaŭ pierakładčykam u armii ZŠA.
Z prezidenckaha ŭkaza taksama vynikaje, što pryjom siryjskich biežancaŭ u ZŠA budzie spynieny na niavyznačany termin, a prahrama pryjomu biežancaŭ ź inšych krain budzie zamarožanaja na 120 dzion.
Pravaabaroncy kažuć, što ŭkaz Trampa nakiravany mienavita na musulman praź ich vieru, i paabiacali davieści spravu da sudu.
Jany śćviardžajuć, što ni adzin ź biežancaŭ, jakija znachodziacca ŭ ZŠA, nie byŭ asudžany za źviazanyja z teraryzmam złačynstvy.
Abviaščajučy pra novaŭviadzieńni, Tramp nahadaŭ usim pra terakty 11 vieraśnia 2001 hoda. Ale nichto z 19 uhonščykaŭ samalotaŭ, jakija razburyli viežy-bliźniaty ŭ Ńju-Jorku, nie byŭ hramadzianinam jakoj-niebudź z krain, jakija ŭvajšli ŭ zabaronieny śpis.
Asnoŭnyja pałažeńni ŭkaza:
- Pryjom biežancaŭ ź inšych krain prypynieny na 120 dzion.
- Całkam na niavyznačany čas spyniajecca prahrama pryjomu biežancaŭ ź Siryi.
- 90-dzionnaja zabarona na ŭjezd u ZŠA luboha, chto prybyvaje z adnoj ź siami krain ź pieravažna musulmanskim nasielnictvam: Iraka, Siryi, Irana, Livii, Samali, Sudana i Jiemiena.
- Zabarona na ŭjezd u krainu raspaŭsiudžvajecca i na tych hramadzian Siryi i šaści inšych krain, u kaho ŭžo jość «zialonaja karta» i chto apynuŭsia za miežami ZŠA.
- Zamiest 110 tys. biežancaŭ, jakich, pavodle ŭstalavanych administracyjaj Abamy limitaŭ, ZŠA pavinny byli pryniać u 2017 hodzie, ustanaŭlivajecca novaje abmiežavańnie ŭ 50 tys. biežancaŭ.
- ZŠA uviaduć abaviazkovyja intervju na atrymańnie viz dla ŭjezdu ŭ krainu. Vyklučeńni z hetaha praviła mohuć być zroblenyja ŭ indyvidualnym paradku.
- Pryjarytetnaje prava na ŭjezd u ZŠA budzie addavacca relihijnym mienšaściam ź inšych krain. Tramp asabliva adznačyŭ chryścijan ź Siryi.
Što pakul nie jasna
Pakul nie jasna, jak hety ŭkaz adabjecca na hramadzianach inšych krain, jakija lehalna pražyvajuć u ZŠA i majuć stały vid na žycharstva.
Pravaabaroncy rajać kansultavacca ź jurystami pa imihracyjnym pravie pierad tym, jak pakidać ZŠA.
Nie zrazumieła, jaki efiekt akaža prypynieńnie prahramy biaźvizavaha režymu na konsulskija słužby ZŠA pa ŭsim śviecie.
Vierahodna, ŭzraście termin čakańnia amierykanskaj vizy.
