Fota sakratara Biełaha doma Šona Spajsiera, @PressSec
Adbyłasia pieršaja razmova Donalda Trampa z prezidentam Rasii Uładzimiram Pucinym. Da hetaha jon razmaŭlaŭ z premjer-ministram Japonii Sindza Abe i kanclerkaj Hiermanii Anhiełaj Mierkiel.
Razmova z Pucinym doŭžyłasia 45 chvilin. Stolki, kolki i ź Mierkiel.
Telefonnyja pieramovy, jakija prezident ZŠA vioŭ z Avalnaha kabinieta, vialisia ŭ prysutnaści viadučych daradcaŭ Trampa. Pry razmovie prysutničali vice-prezident ZŠA Majkł Piens, pamočnik prezidenta pa nacyjanalnaj biaśpiecy Majkł Flin, načalnik aparata supracoŭnikaŭ Biełaha doma Rajns Prybes i palityčny daradca prezidenta Styvien Benan.
Vynikaŭ hetych pieramovaŭ z asablivaj cikavaściu čakajuć u Maskvie i jeŭrapiejskich krainach, bo niekalkimi dniami raniej raspaŭsiudžvalisia źviestki pra mahčymuju admienu amierykanskich sankcyj suprać Rasii.
U piatnicu, na sumiesnaj pres-kanfierencyi Donalda Trampa i brytanskaha premjer-ministra Terezy Mej, prezident ZŠA zajaviŭ, što ab admienie sankcyj suprać Rasii «kazać pakul rana». Adnak paźniej, u razmovie z žurnalistami, Tramp zrabiŭ zajavu, jakaja pakidaje miesca dla zdahadak, što pazicyja Vašynhtona moža źmianicca. Prezident ZŠA litaralna skazaŭ: «My pasłuchajem, što budzie čuvać».
Adnačasova, 27 studzienia źviarnuła na siabie ŭvahu zajava Kelien Konuej, daradcy Trampa, pra toje, što ŭ Biełym domie razhladajuć pytańnie ab źniaćci sankcyj.
