U Babrujsku na dziasiaty dzień zboru podpisaŭ za admienu dekreta «ab darmajedstvie» była zatrymanaja aktyvistka prafsajuza REP Halina Śmirnova. Zdaryłasia heta paśla sustrečy z deputatam Vitalom Ułasievičam.

Incydent adbyŭsia paśla taho, jak žančyna sustrełasia z deputatam i paprasiła jaho padpisać zvarot z patrabavańniem admianić dekret. Narodny vybrańnik admoviŭsia, a praź niekalki hadzin milicyja zatrymała aktyvistku i kanfiskavała podpisy.

Halina Śmirnova paviedamiła praca-by.info, što na pryjom da deputata Vitala Ułasieviča jana razam sa svaim kaleham Aleham Žałnovym pryjšła ŭ subotu ranicaj, 28 studzienia, papiarednie zapisaŭšysia na pryjom.

— My raspaviali jamu, što prablema zakranuła vielmi mnohija siemji, bolšaść ludziej zusim niespraviadliva patrapili ŭ razrad tak zvanych «darmajedaŭ». U małych haradach pracy niama, pracadaŭcy nie chočuć brać na pracu mam z maleńkimi dziećmi, vielmi mnohija ludzi nie mohuć znajści pracu abo nie mohuć pracavać pa stanie zdaroŭja. My skazali jamu, što jon abaviazany prysłuchacca i reahavać, raz jaho abrali na hety post. Jon pavinien abaraniać intaresy ludziej i adpracoŭvać tyja hrošy, jakija niadrenna na hetym pasadzie zarablaje. My prasili jaho pastavić podpis pad patrabavańniem, jakoje padpisali ŭžo sotni babrujčan, u tym liku jaho vybarščykaŭ, a taksama prapanoŭvali sustrecca ź ludźmi i abmierkavać prablemu. Adnak Vital Ułasievič admoviŭsia, zajaviŭšy, što na siońniašni dzień u Biełarusi nie pracuje tolki toj, chto nie choča pracavać, — raspaviała prafsajuznaja aktyvistka.

Pa jaje słovach, deputat padrabiazna cikaviŭsia, u jakich miescach aktyvisty źbirajuć podpisy. Halina Śmirnova ščyra raspaviała, što paśla sustrečy ź im pojdzie na miascovy rynak, tamu što tam u vychadny dzień budzie šmat ludziej.

— Paśla sustrečy my nie adrazu adpravilisia na rynak, ale kali pryjšli tudy, litaralna praz chvilinu da nas padyšli milicyjanty i paprasili prajechać u RAUS. Pryčym, niekalki dzion tamu padčas zboru podpisaŭ hetyja ž milicyjanty spakojna abmiarkoŭvali z nami prablemny dekret, — paviedamiła aktyvistka.

U RAUS Halinu Śmirnovu abšukali, hvałtoŭna zabrali partfiel i kanfiskavali tysiaču podpisaŭ.

— Mnie pryjšłosia doŭha čakać, pakul jany, narešcie, zmahli pravieści pieratrus, tamu što ludzi, daviedaŭšysia, u čym sprava, admaŭlalisia być paniatymi. Byŭ składzieny pratakoł ab parušeńni zakona ab masavych mierapryjemstvach. Mnie nie dali na ruki vopis kanfiskavanych dakumientaŭ i nie dali padpisacca ŭ pratakole. Tamu ja nie viedaju, što jany tam jašče napišuć. Heta prosta rabavańnie, prosta podłaje rabavańnie, — zaklučyła Halina Śmirnova.

Staršynia prafsajuza REP Hienadź Fiadynič zapeŭniŭ, što «ułady spałochalisia narodnaj niezadavolenaści i vyrašyli vykarystać stary pryjom — represii». Adnak prafsajuzny lidar upeŭnieny, što na hety raz im nie ŭdasca zapałochać narod.

— My nie pakiniem ni adzin vypadak biez uvahi. Kali siońnia ŭłady chočuć takim čynam źbić chvalu abureńnia ludziej z nahody dekreta ab «darmajedach», to jany nie ŭhadali, — zajaviŭ lidar prafsajuza REP.

Клас
0
Панылы сорам
0
Ха-ха
0
Ого
0
Сумна
0
Абуральна
0