Partyja BNF u 2017 hodzie maje namier praciahnuć pracu pa abaronie niezaležnaści i nacyjanalnych kaštoŭnaściaŭ. Pra heta było zajaŭlena 4 lutaha na pasiadžeńni sojma arhanizacyi.
U ramkach hetaha kirunku partyja, paviedamiŭ jaje staršynia Alaksiej Janukievič, maje namier pravieści šerah kampanij: u abaronu statusu biełaruskaj movy jak dziaržaŭnaj, za admienu sumiesnych z Rasijaj vajennych vučeńniaŭ u Biełarusi «Zachad-2017», suprać viz Sajuznaj dziaržavy, za kantrol na miažy z Rasijaj, za poŭnuju adnabakovuju admovu ad viz dla hramadzian ES, ZŠA, Kanady, Aŭstralii i inšych krain.
Taksama partyja maje namier: patrabavać uviadzieńnia kryminalnaj adkaznaści za publičnyja vykazvańni, jakija admaŭlajuć isnavańnie biełaruskaj nacyi, biełaruskaj movy i biełaruskaj dziaržaŭnaści; sadziejničać umacavańniu patryjatyčnaha duchu ŭ biełaruskaj armii; nastojvać na vychadzie Biełarusi ź JEAES i ADKB.
Akramia taho, u 2017 hodzie Partyja BNF maje namier pravodzić pracu pa kantroli za dziejnaściu deputataŭ Pałaty pradstaŭnikoŭ u akruhach, pa jakich jany abiralisia. U ramkach hetaha kirunku arhanizacyja praviadzie manitorynh dziejnaści deputata ŭ akruzie i parłamiencie. U vypadku nienaležnaha vykanańnia dziejnym deputatam svaich pieradvybarnych abiacańniaŭ i abaviazkaŭ, partyja płanuje arhanizacyju kampanij pa adklikańni deputata z metaj damahčysia paŭtornych vybaraŭ u akruzie.
Asobnymi kirunkami pracy Partyi BNF stanuć arhanizacyja i praviadzieńnie ŭ Minsku i inšych haradach masavych akcyj, a taksama padrychtoŭka da čarhovych vybaraŭ deputataŭ miascovych savietaŭ, jakija adbuducca nie paźniej za 20 lutaha 2018 hoda.
