Jak stała viadoma «Priessbołu» ź nieaficyjnych krynic, Suśvietnaje antydopinhavaje ahienctva (WADA) źniała pretenzii da biełaruskaha kanaista Maksima Piatrova, u jakoha było vyjaŭlena niaznačnaje pieravyšeńnie kancentracyi mieldoniju ŭ dopinh-sprobie, uziataj na trenirovačnym zbory ŭ Francyi viasnoj minułaha hoda.
Takim čynam, z mužčynskaj biełaruskaj kamandy źniatyja absalutna ŭsie padazreńni ŭ vykarystańni zabaronienych preparataŭ.
Sam Piatroŭ u razmovie z karespandentam «Priessboła» hetuju infarmacyju paćvierdziŭ.
Nahadajem, što 23 studzienia Spartyŭny arbitražny sud (CAS) u Łazanie admianiŭ hadavuju dyskvalifikacyju mužčynskaj zbornaj Biełarusi pa viesłavańni na bajdarkach i kanoe, nakładzienuju Mižnarodnaj fiederacyjaj kanoe (ICF) z-za padazreńniaŭ u parušeńni antydopinhavych praviłaŭ.
A za paru dzion da hetaha Nacyjanalny alimpijski kamitet Biełarusi atrymaŭ aficyjnaje paviedamleńnie ad francuzskaha antydopinhavaha ahienctva, u jakim kazałasia, što pretenzij da čatyroch ź piaci biełaruskich vieślaroŭ, jakija padazravalisia ŭ parušeńni antydopinhavych praviłaŭ pa vynikach zboraŭ u Francyi ŭ krasaviku 2016 hoda, niama. Heta Andrej i Alaksandr Bahdanovičy, Alaksandr Lapieška, Dźmitryj Silčanka.
Zastavaŭsia adzin Maksim Piatroŭ, u jakoha było niaznačnaje pieravyšeńnie ŭtrymańnia mieldoniju. Ciapier WADA źniała pretenzii i pa dačynieńni da jaho.
Biełaruś budzie rychtavać pazoŭ u sud u Šviejcaryi ab kampiensacyi maralnaj škody, jaki paniesła kamanda ŭ suviazi ź niadopuskam na Alimpijskija hulni i biespadstaŭnym źniaćciem na paŭhoda ad trenirovačnaha pracesu i mižnarodnych startaŭ. Taksama biełaruski bok maje namier padać pazoŭ ab kampiensacyi vydatkaŭ na padrychtoŭku kamandy da Alimpijady za čatyry hady.