Pa słovach Barančyka, 8 lutaha ŭ ofis «Rehnuma» pryjšoŭ nieviadomy čałaviek, jaki pradstaviŭsia Dzianisam. Jon chacieŭ parazmaŭlać asabista ź Juryjem Barančykam i pieradać kanfidencyjnuju infarmacyju ad «vielmi surjoznych ludziej». Razmaŭlać z kimści inšym z redakcyi Dzianis admoviŭsia.

Redakcyja pryvodzić dadzienyja, što pierad hetym nieviadomyja ludzi, siarod jakich byŭ toj samy Dzianis, pravodziła ahlad ofisnych pamiaškańniaŭ na maskoŭskaj fabrycy «Čyrvony Kastryčnik».

Praź niejki čas namieśnik hienieralnaha dyrektara «Rehnuma» patelefanavaŭ Dzianisu, kab daviedacca, pra što išła havorka. Surazmoŭca zapeŭniŭ, što havorka idzie pra Biełaruś, ale razmaŭlać jon moža tolki asabista z Barančykam.

Na pytańnie, ci źjaŭlajecca Dzianis supracoŭnikam KDB, nijakaha adkazu atrymana nie było. «Jość usie padstavy mierkavać, što čałaviek, jaki prychodziŭ i jaho naparnik źjaŭlajucca supracoŭnikami śpiecsłužbaŭ Biełarusi, i na terytoryi fabryki «Čyrvony Kastryčnik», i ŭ ofisie IA REGNUM pravodzili apieratyŭnyja mierapryjemstvy», — miarkuje vydańnie.

«Uličvajučy, što ŭ Biełarusi aryštavanyja aŭtary IA REGNUM, a Juryj Barančyk, pa viersijach biełaruskich pravaachoŭnikaŭ, źjaŭlajecca «arhanizataram złačynnaj hrupy», u ahienctva majucca abhruntavanyja aściarohi, što dadzienyja apieratyŭnyja mierapryjemstvy pravodziacca ŭ ramkach raspracoŭki novych kryminalnych spraŭ u dačynieńni da inšych rasijskich žurnalistaŭ».

U śniežni ŭ Biełarusi byli zatrymanyja aŭtary «Rehnuma» Juryj Paŭłaviec, Dźmitryj Alimkin i Siarhiej Šyptenka. Hetyja ludzi nazyvali Biełaruś «niedadziaržavaj» i stavili pad sumnieŭ niezaležnaść našaj krainy. Jany prachodziać pa artykule 130 KK «Raspalvańnie rasavaj, nacyjanalnaj albo inšaj varožaści». Były supracoŭnik Akademii kiravańnia pry prezidencie Juryj Barančyk byŭ nazvany zamoŭcam paklopnickich artykułaŭ.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?