Ryhor Kisiel, jaki ŭznačalvaŭ telekanał ANT 15 hadoŭ, syšoŭ z pasady 21 sakavika. Heta dziŭna — čałaviek moh by jašče pracavać i pracavać. Na anałahičnych pasadach u inšych dziaržSMI pracujuć i starejšyja kadry. Sychod supaŭ z razhortvańniem u niekatorych ŚMI biesprecedentnaj kampanii fejkaŭ i zastrašvańnia. Pra adstaŭku «pa pahadnieńni bakoŭ» stała viadoma napiaredadni Dnia Voli.
ont.by
U intervju TUT.BY jon raspavioŭ, čym zojmiecca ŭ bližejšy čas.
U piatnicu stała viadoma, što źmianiłasia kiraŭnictva ZAT «Druhi nacyjanalny telekanał». Kresła Ryhora Kisiala zaniaŭ Marat Markaŭ, jaki da hetaha zajmaŭ pasadu namieśnika staršyni Biełteleradyjokampanii.
— U mianie 21 sakavika skončyŭsia kantrakt. Na kanale ANT adpracavaŭ roŭna 15 hadoŭ i zarabiŭ zasłužany adpačynak, mnie ž chutka 62 hady, — raspavioŭ TUT.BY Ryhor Kisiel.
— Dyk vy vyrašyli adpačyć krychu? Prosta z ulikam taho, jaki vy aktyŭny, biehajecie pa 10 kiłamietraŭ kožny dzień, vas ciažka ŭjavić biez pracy.
— Ja i zaraz aktyŭny, užo biehaju pa 25 kiłamietraŭ, navat jość videa maich zabiehaŭ dla historyi. Jak ja ŭžo skazaŭ vyšej, kantrakt skončyŭsia, ja pajšoŭ pavodle pahadnieńnia bakoŭ, vyrašyli, što troški adpačnu, ahledžusia i vyrašu, čym dalej zajmacca. Tvorčaść — jana nie ŭ pracoŭnaj knižcy, a ŭ hałavie. Televizijnuju prahramu ja mahu rabić i biez pasady, jašče lahčej budzie, ja ž ciapier nie abciažarany kłopatami.
— Ryhor Leanidavič, vy byli nastolki zaniatyja ŭsie hetyja hady, što naŭrad ci byŭ volny čas. Čym vy zaraz zojmieciesia, kali źjaviłasia takaja mahčymaść?
— Ciapier kožny dzień budu zajmacca sportam. Mnie vielmi padabajecca biehać. Mahčyma, prajdu miedycynskaje abśledavańnie, kab razumieć, jaki ŭ mianie resurs. Samaje hałoŭnaje - u mianie jość dzieci, piaciora ŭnukaŭ, ja z-za pracy naohuł nie bačyŭ, jak jany rastuć. Ź imi pazajmajusia, a tam hladziš i pryjdu da novaha vidu dziejnaści. Uvohule, usio aptymistyčna i ŭsio dobra.
— Vy ž viedajecie novaha kiraŭnika ANT?
— Viadoma, i daŭno. My litaralna ź im siońnia hutaryli dźvie hadziny, na maim byłym pracoŭnym miescy, na jaho ciapierašnim. Ja jamu pažadaŭ pośpiechu.
***
Ryhor Kisiel uznačaliŭ ANT u 2002 hodzie. Łukašenka nie raz zhadvaŭ jaho imia padčas publičnych vystupaŭ. Naprykład, u 2011 hodzie Alaksandr Łukašenka prosta padčas pres-kanfierencyi paprasiŭ kiraŭnika ANT raspavieści aniekdot pra prezidenta. A padčas «Vialikaj razmovy» ŭ hetym hodzie Łukašenka ŭzhadaŭ Kisiala, kažučy pra svaje rezidencyi:
— Voś Ryhor Leanidavič siadzić, jon čałaviek ciapier zaniaty, mnie jaho časta davodzicca bačyć. Jon da mianie pryjazdžaje, my pa-viaskovamu siakieraj pamachać lubim, pakasić.
