Ci 25 sakavika ŭ Biełarusi budzie zabłakavany dostup da sacyjalnych sietak i internet-staronak?
Techničnaja mahčymaść dla takoha va ŭładaŭ jość. Ci pryniataje takoje rašeńnie, viadoma tolki vuzkamu kołu ludziej, prysutnamu na naradzie ŭ Alaksandra Łukašenki 23 sakavika.
Nahadajem, što lidary pratestaŭ, u tym liku Mikałaj Statkievič, zaklikali na Dzień Voli pravieści ŭ Minsku demanstracyju suprać ekanamičnaj palityki ŭładaŭ. Administracyja horada šeście nie dazvoliła, ale masavy zbor narodu ŭsio adno čakajecca.
Błakavańnie asobnych sajtaŭ ci navat hmejła i fejsbuka ŭžo zdarałasia ŭ minułyja hady padčas vialikich demanstracyj pratestu. Takoje ŭ toj ci inšaj formie adbyvałasia ŭ 2001, 2004, 2006, 2010 i 2014 hadach.
Sposaby błakavańnia sajtaŭ byli roznymi, ad ddos-atak da adklučeńnia adrasa raźmieščanaha ŭ Biełarusi sajta. Nieadnolkavym byŭ i pośpiech hetych mierapryjemstvaŭ. Zdajecca, ułady bajalisia, kab pratestoŭcy nie kaardynavali svaich dziejańniaŭ praź internet, a taksama imknulisia abmiežavać raspaŭsiud fota i videa ź Minska, jakija abviarhajuć stereatypy ab usieahulnaj padtrymcy Alaksandra Łukašenki.
Praŭda, u tyja hady internet nie adyhryvaŭ takoj važnaj roli ŭ žyćci ludziej. Pierakryćcio sieciva siońnia było b zaŭvažanaje našmat bolšaj kolkaściu ludziej i naniesła b bolšuju ekanamičnuju škodu pradpryjemstvam krainy.
U toj ža čas błočyć asobnyja navinnyja resursy nie maje vialikaha sensu va ŭmovach isnavańnia sacyjalnych sietak, bo infarmacyja praź ich razychodzicca imhnienna, u tym liku i žyvyja videastrymy.
Važna nie paddavacca isteryi: dostup da internetu ci zabłočanych sajtaŭ zaŭsiody viartajecca nieŭzabavie paśla skančeńnia demanstracyi.
Dzie šukać naviny ŭ vypadku błakavańnia sajtaŭ 25 Sakavika
