Milicyja dziažuryć kala kvater Vadzima Žaromskaha i Maksimilijana Piakarskaha.

25 sakavika doma ŭ baćkoŭ Vadzima Žaromskaha (na fota sprava) ŭ Smarhoni prajšoŭ vobšuk. Pavodle ich słovaŭ, milicyjanty ŭvieś čas atrymlivali instrukcyi ad trecich asob pa telefonie. Sam Žaromski ciapier znachodzicca ŭ Minsku, i kala jaho kvatery taksama dziažuryć milicyja. Maksimilijana Piakarskaha (na fota z Žaromskim) zabłakavali doma ŭ Smarhoni z maci i siastroj sutki tamu. Im, pavodle ich śviedčańniaŭ, vyklučali śviet i hłušyli mabilnuju suviaź. Na vulicy i ŭ padjeździe byli milicyjanty. A sieńnia da doma Piakarskaha pryjechali ažno try pažarnyja mašyny.

Urešcie milicyjanty ŭsio-taki zmahli ŭvajści:

A voś i sam vobšuk u pramym efiry:

Vadzim Žaromski kaža što vobšuk u jaho baćkoŭ, jak patłumačyli milicyjanty, byŭ źviazany z tym, što ŭ sakaviku 2015 hoda na smarhonskim rajvykankamie źjaviłasia hrafici palityčnaha źmiestu.

A kamiery videanazirańnia ŭ tuju noč čamuści nie pracavali. Tady dapytvali ŭsiu smarhonskuju moładź. «Ciapier viedaju, što tolki nas dvaich z Maksam pa spravie hetaj padazrajuć, ale u 2015 navat nie vyklikali. U ich niečakana adšukaŭsia niejki śviedka», — kaža Žaromski.

Zatrymlivać ludziej z dapamohaj pažarnych dy MČS — heta novaja praktyka siłavych struktur u małych haradach. Tak užo zatrymali Paŭła Siarhieja ŭ Maładziečna. 

Maksim Piakarski, Viačasłaŭ Kasinieraŭ i Vadzim Žaromski — troje hraficistaŭ, jakich letam 2015 hoda žorstka zatrymała milicyja. Pryčynaj stała zapeckvańnie farbaj biłbordaŭ i malavańnie hrafici «Biełaruś maje być biełaruskaj». Kasinieravu pry zatrymańni złamali skivicu (u kryminalnaj spravie ŭ dačynieńni da supracoŭnika SACHR chłopcu paźniej admovili). Maksim Piakarski kala 20 dzion pravioŭ za kratami. Paźniej sud nie vyjaviŭ u ich dziejańniach złosnaha chulihanstva i daŭ štraf za paškodžańnie majomaści.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?