Lider «Biełaruskaha nacyjanalnaha kanhresu» Mikoła Statkievič paśla vyzvaleńnia prapanavaŭ praciahvać pratesty, ale mianiać taktyku — vychodzić na dziaržaŭnyja śviaty. U jakaści prykładu jon pryvioŭ 1 traŭnia dla ekanamičnych i sacyjalnych patrabavańniaŭ, 9 traŭnia — dla lozunhaŭ ab vyzvaleńni ad akupacyi.

Svaboda spytała inšych lideraŭ apazycyi pra ich acenku takoj idei.

Labiedźka: možna abmiarkoŭvać

Adzin ź lideraŭ «Pravacentrysckaj kaalicyi», staršynia Abjadnanaj hramadzianskaj partyi Anatol Labiedźka kaža, što takuju ideju možna abmiarkoŭvać siarod inšych:

«My siońnia praviali presavuju kanferencyju, pravacentrysty vykłali svaje prapanovy: našy patrabavańni i jak ich damahacca. Adzin z punktaŭ — prapanova praciahvać toje, što my ahučyli na pačatku hetaha hodu. Heta značyć, «Maršy niedarmajedaŭ», asabliva ŭ tych rehijonach, dzie ich jašče nie było.

Kali heta rabić? Možna i ŭ dziaržaŭnyja tak zvanyja «śviaty», možna i ŭviečary, kab ludziam było dastupna. My hatovyja heta abmierkavać. Ale heta musić być «zatočana» pad kankretnyja mety i zadačy. Kali buduć dadatkovyja prapanovy, my budziem hatovyja abmiarkoŭvać i padsumoŭvać.

Janukievič: heta niesurjozna

Staršynia partyi BNF Alaksiej Janukievič nehatyŭna acaniŭ prapanovu Statkieviča:

«Ja liču, što ŭ nas jość užo ciapier svaje daty: sioleta i 26 krasavika, i 27 lipienia, i 8 vieraśnia, i inšyja daty. Ja nehatyŭna staŭlusia da idei sumiaščać aficyjnyja śviatkavańni i akcyi pratestu.

Užo byli takija sproby ŭ tym ža 2011 hodzie: my bačyli, što pryznačyć akcyi pratestu na toj ža čas, što i dziaržaŭnyja śviaty, abviaścić, što ŭsie hetyja ludzi znachodziacca tut na naš zaklik — heta niesurjozna. Mnie zdajecca, kali niejkaja akcyja pratestu, salidarnaści ci ŭ abaronu niezaležnaści, pavinny być zrazumiełyja skład udzielnikaŭ, data i nahoda».

Dźmitryjeŭ: treba pierapynak

Lider «Havary praŭdu» Andrej Dźmitryjeŭ miarkuje, što pratesty mohuć «upisacca ŭ kantekst» 1 traŭnia, ale naŭrad ci 9-ha:

«Ja dumaju, tut nia treba «albo tak, albo tak», a treba zychodzić sa zdarovaha sensu. I nia važna, rabić heta ŭ dni dziaržaŭnych śviataŭ ci asobna; u lubym vypadku, jak pakazała 25 sakavika, hałoŭnaje — heta sapraŭdy rychtavacca da taho, što ty robiš, kłapacicca pra biaśpieku ludziej i mieć nia tolki plan «my vyjdziem z punktu A ŭ punkt B, i ŭsio budzie dobra», a mieć plan B i plan V, dzie kazać, što ludziam rabić, kali samy prosty i vidavočny plan niemahčyma realizavać.

Taksama treba razumieć staŭleńnie hramadztva. 1 Traŭnia — tak, heta Dzień pracy, heta balučyja sacyjalnyja prablemy. A kali my kažam pra 9 Traŭnia, to ja nie ŭjaŭlaju, jak vyjści ŭ hety dzień z sacyjalnymi lozunhami, navat hramadztva budzie heta kiepska ŭsprymać. Heta, jak my viedajem, chiba nie hałoŭnaje śviata, balšynia biełarusaŭ ličyć jaho svaim. Možna dałučacca da roznych akcyjaŭ ci rabić svaje, ale heta ŭsio ž całkam śviata, a nia dzień pratestaŭ. I vy viedajecie, pazycyja «Havary praŭdu» takaja, što i 25 Sakavika — heta taksama najpierš śviata. A toje, što jaho spałučyli z «Maršam aburanych biełarusaŭ», dyk ni śviata nie było, ni pratestu nie było».

A pratesty buduć?

Ci nie spužajecca narod vychodzić na nastupnyja pratesty paśla razhonaŭ i zatrymańniaŭ 25 sakavika i 26 sakavika, raniejšych i ciapierašnich sudoŭ za akcyi pratestu?

«Čas pakaža, ale my musim zrabić usio, kab «prastora svabody», što ŭźnikła ŭ apošni čas dziakujučy tamu, što ludzi stali mienš bajacca, tolki pavialičvałasia, — kaža Anatol Labiedźka. — My ahučyli tyja rehijony, dzie jość ludzi, hatovyja da novych «Maršaŭ niedarmajedaŭ», budziem padavać zajaŭki. My b chacieli dumać u pieršuju čarhu pra biaśpieku. Łukašenka zajaviŭ, što ŭ kožnym horadzie musić być placoŭka, kudy ludzi mohuć volna prychodzić i vystaŭlać svaje patrabavańni. Pahladzim, ci heta čarhovaje «bła-bła-bła», ci heta toj punkt, jaki daść ludziam mahčymaść mienš bajacca i stvaryć placoŭki dla kamunikacyi tych, chto za pieramieny, z tymi, chto naležyć da vertykali ŭłady».

«Ja nia dumaju, što narod spužajecca, ja sapraŭdy liču, što tyja ludzi, jakija vyjšli 25 i 26 sakavika, nie bajalisia, — razvažaje Alaksiej Janukievič. — Ja nia dumaju, što źjavicca ŭ ich strach paśla taho, jak jany byli zatrymanyja, a niechta pajechaŭ na sutki. Bolš za toje, ludziej, matyvavavanych kaštoŭnaściami (a ich bolšaść z tych, chto vyjšaŭ 25 sakavika), naŭrad ci možna spałochać zatrymańniami i administracyjnymi aryštami. Sapraŭdy, častku «niedarmajedaŭ» takija dziejańni ŭładaŭ prymusiać ustrymacca ad dalejšaha vykazvańnia niezadavolenaści sacyjalna-ekanamičnym stanoviščam. Sapraŭdy, chvala pratestaŭ suprać dekretu № 3 pojdzie na spad, heta niepaźbiežna. Ale ŭsio roŭna ŭ krainie buduć ludzi, jakija ceniać svabodu i nacyjanalnuju hodnaść vyšej za ŭsio — i jany buduć hatovyja ŭdzielničać u vuličnych akcyjach».

«Ciapier možna prosta zrabić peŭny pierapynak, — ličyć Andrej Dźmitryjeŭ. — Pa-pieršaje, 26 krasavika budzie «Čarnobylski šlach», a Čarnobyl — heta ahulnanacyjanalnaja trahiedyja, źviazanaja nia stolki z samim vybucham, kolki z nastupstvami, najpierš rakavymi zachvorvańniami. A potym 1 Traŭnia. Ja dumaju, ludziam budzie kudy pryjści. Ale, paŭtarusia, plan «sabralisia-pajšli-pakryčali-razyšlisia» nie spracoŭvaje. Jon spracoŭvaje tolki na toje, kab ułady zrabili z takim planam usio, što zachočuć. Važna ludziej papiaredžvać pra roznyja mahčymaści, vynieści z 25 Sakavika šmat urokaŭ, u tym liku pra toje, što my majem uładu, jakaja taksama planuje, jak svaich metaŭ damahčysia. Plan «a raptam» nie pracuje».

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?