Supracoŭniki staličnaha ŭpraŭleńnia pa raskryćci złačynstvaŭ u śfiery vysokich technałohij zatrymali 28-hadovaha minčuka, jaki vydaliŭ z sajta byłoha pracadaŭcy katałoh, «źnios klijenckuju bazu» i zabłakavaŭ dostup da karparatyŭnaj pošty. Pra heta paviedamlaje pres-słužba HUUS Minharvykankama.

28-hadovy mužčyna pracavaŭ zahadčykam handlovym abjektam firmy, jakija zajmajucca pastaŭkami na biełaruski rynak santechničnaha abstalavańnia ź Ispanii i Šviejcaryi. Taksama jon byŭ administrataram sajta kampanii. U niejki momant z kiraŭnictvam adbyŭsia kanflikt — mužčyna paličyŭ, što jaho pracu niedastatkova vysoka aceńvajuć, i ŭ vyniku zvolniŭsia.

Paśla zvalnieńnia, skarystaŭšysia dostupam da sajta kampanii, jon vydaliŭ bolš za 3 tysiačy pazicyj tavaraŭ z katałoha, «źnios» klijenckuju bazu, źviestki ab zamovach, a taksama artykuły ab pracy kampanii.

«Bolš za toje, jon zanios zahadzia iłžyvuju infarmacyju na sajt, paśla i zusim źmianiŭ parol dostupu da paneli kiravańnia sajtam, a taksama zabłakavaŭ dostup da pošty pradpryjemstva», — raspavioŭ načalnik upraŭleńnia «K» HUUS Minharvykankama Andrej Kavaloŭ.

U kampaniju stali pastupać zvanki ad niezadavolenych klijentaŭ z usioj Biełarusi, što pahražała firmie strataj nie tolki prybytku, ale i dziełavoj reputacyi. Kiraŭnictva kampanii źviarnułasia ŭ milicyju.

«Supracoŭniki ŭpraŭleńnia «K» ŭstalavali dačynieńnie byłoha supracoŭnika da niesankcyjanavanaha dostupu da kampjutarnaj infarmacyi. U mužčyny kanfiskavali kampjutarnuju techniku, u chodzie jaje ahladu byli znojdzienyja fajły, jakija supracoŭniki milicyi pieradali kampanii, i sajt byŭ adnoŭleny», — dadali ŭ HUUS.

U dačynieńni da mužčyny byli zaviedzienyja adrazu try kryminalnyja spravy pa č.2 art. 351 (kampjuterny sabataž), pa č.2 art. 349 (niesankcyjanavany dostup da kampjutarnaj infarmacyi) i pa č.2 art. 350 (madyfikacyja kampjutarnaj infarmacyi) Kryminalnaha kodeksa Biełarusi.

Клас
0
Панылы сорам
0
Ха-ха
0
Ого
0
Сумна
0
Абуральна
0